Attualità

Timpurali in Corsica: duie persone morte in u so veiculu in Purtivechju

Un drama s’hè pruduttu sta notte in Purtivechju induve un coppiu s’hè anneiatu in a so vittura nant’à a strada Territuriale 10 trà Purtivechju è Bunifaziu, versu un'ora di matina. Un passageru hè riesciutu à cacciassi da u veiculu. Hè statu succorsu è evacuatu per elicotteru versu a clinica di Purtivechju.

A notte in u rughjone purtivechjacciu hè stata particularmente difficiule per via di u gattivu tempu è i timpurali ch’anu toccu u stremu sudu di a Corsica. Strade bluccate, ponti sradicati, case inundate, u paisolu di Murateddu cunfinatu… Eri 120 persone sò state evacuate in i settori di Purtivechju, l’Alta Rocca è Figari particularmente cuncernati da l’episodiu timpuralescu, è messe in securità à u COSEC di Purtivechju. Altre persone devenu esse evacuate oghje. Una famiglia chì stà vicinu à  u fiume Bala hè stata evacuata dop’avè passatu duie ore nant’à u tettu di a so casa. A so banda di capre hè stata anch’ella salvata cume parechji animali di cumpagnia, grazia à l’azzione di numerosi succorsi. 

In Ghisunaccia, duie persone, bluccate da a fiumara, sò state succorse.

A situazione ferma preoccupante in u suttanacciu induve numerosi suldati di u focu fermanu mubilizati.