Nutiziale culturale

26esima edizione di i scontri musicali di Mediterraniu da u 3 à l’8 di nuvembre

A Corsica è sei altri paesi participeghjanu à st’evenimentu urganisatu da e Giuventù Musicale di Mediterranie. L’invitata d’onore 2025 hè u Libanu. Ci sò dinù a Tunisia, l’Italia, l’Egittu, a Spagna, u Maroccu. In tuttu, sette furmazione musicale è ottu gruppi corsi pè 32 cuncerti in stabilimenti sculari, in EHPAD, 5 « Stonde » (à a Casa di e lingue è Casa di l’anziani in Bastia), à u cunservatoriu Henri Tomasi, una cunferenza di François Berlinghi, duttore in antropolugia di u musicale : « U Versu » ind’a pratica di u cantu tradiziunale corsu venneri u 7 di nuvembre à 6 ore à a Bibliuteca Municipale di Bastia.

A manifestazione hè prevista in Bastia, Aiacciu, Furiani, Biguglia, U Borgu, Lucciana, Folelli, Lumiu, Oletta, Petranera, Siscu, Bunifaziu, Tallone, L’Isula. Cusì, sti scontri vanu à scuntrà a ghjente pè dialugà cun ella. In quant’à l’ultimu serata, hè prevista à u centru culturale L’Alb’Oru à Bastia sabbatu l’8 di nuvembre à 8 ore è mezu. Canteranu in prima parte : Doria Ousset, Quintina « Canti di Corsica è d’altrò », l’Inseme « Canti è musiche di Corsica è di u Mediterraniu », Petru Santu Guelfucci. In seconda parte, si senterà a musica d’ogni furmazione mentre ottu minuti. Dopu, i giovani musicanti di i paesi mediterranii invitati diventeranu un solu orchestru, una sola voce sott’à a direzzione di u Maestro Alessandro Bombonati.

Pè a canzona finale, Doria Ousset è Petru Santu Guelfucci interpreteranu in duettu A l’altru mondu. Cumposta da i fratelli Vincenti, porta in ella un messagiu di cunsulazione chì un figliolu, mortu troppu prestu, manda à a so mamma da l’altru mondu. Hè stata selezziunata è cantata in lingua corsa da canterini libanesi dopu i schelleri di Beyrouth d’aostu 2020 in omagiu à tutte e vittime, in particulare e mamme avendu persu figlioli durante stu dramu. A l’altru mondu face a leia trà Corsica è u Libanu, invitatu d’onore pè una grande stonda musicale d’emuzione, di fratellanza è di spartimentu. Infine, u magnificu affissu di i sti 26esimi scontri musicali di Mediterraniu hè di Dominique Ceccaldi pè un omagiu è una speranza mentre e guerre chì si passanu in u mondu.

Infurmazione è prugramma :  https://www.jmm.corsica/