Nutiziale culturale

Una franchizia Pasquale Paoli pè i 300 anni di a so nascita

Pè st’anniversariu storicu, una franchizia di a Posta serà messa in circulazione u 6 d’aprile, ghjornu di l’anniversariu. Hè ispirata da una pittura di Sir Thomas Lawrence. A scelta d’un pittore inglese rimanda à l’esiliu di Paoli è à a so lascita in Europa. Un’opera pè incarnà l’omu di u so seculu in core di i scunvuglimenti di a so epuca. À l’orlu di u fogliu, a testa mora ramenta a so lascita pè a Corsica. A parte da u 7 d’aprile, serà venduta in parechji scagni pustali è nant’à u situ di a Posta. 

Pè l’amatori di filatelia, un’obliterazione suciale si pò fà à a buttega “Le Carré d’Encre” in Parigi, sin’à l’8 d’aprile. Hè prevista una pruduzzione di sei centu dece mila è duiecentu esempiari è un prezzu di 1,39 €. Cusì, un’occasione pè i passiunati di storia, di filatelia è d’identità isulana di buscassi un pezzu di memoria, stampata in a carta è in a storia.