Nutiziale culturale

Terzu Festivale Camera pulitica in Biguglia, spaziu Carlu Rocchi da u 24 à u 29 di nuvembre

Organisatu da u festivale Arte Mare è a cità di Biguglia, Camera Pulitica hè cunsacratu à e pruduzzione cinematugrafiche puliticamente impegnate. L’invitatu d’onore quist’annu hè u famosu scrittore americanu Douglas Kennedy chì parechje opere sò state adattate à u cinema. Durante l’evenimentu, seranu diffusate tredeci prughjezzione di Corsica è d’altrò, frà elle ondeci presentate nanzu a so surtita ufficiale. Sò fundate nant’à prublematiche storiche o sempre attuale. Parechje diffusione si feranu cù a participazione di e squadre di rialisazione. A prima serà quella di u filmu “La troisième nuit”, rialisatu da Daniel Auteuil. S'ispira di u salvamentu di 108 zitelli ghjudei cacciati da u campu di Vénissieux, durante a grande operazione d’arrestazione di ghjudei di u 26 d’aostu di u 1942. Dopu, “Mon fils président”, filmu nant’à l’elezzione presidenziale francese cù u so rialisadore Mathias Mlekuz. Participeranu dinù u psicanalistu è scrittore Joseph Agostini, Alain Luciani passiunatu di cinema, Bertrand Puard, autore pè a giuventù, Denis Parent criticu di cinema, rumanzeru è rialisadore. 

D’altrò, Camera Pulitica ùn hè micca solu un festivale di cinema puliticu, difatti quattru dibattiti veneranu à arricchì a riflessione è cunfruntà l’opinione nant’à sugetti pulitichi chì ponu esse pulemichi. Seranu animati da u giurnalistu Christophe Bourseiller. Per esempiu, l’intervista di Douglas Kennedy da Sébastien Bonifay, giurnalistu à Via Stella, nant’à una questione d’attualità : un hè micca l’America ! Chì avvene dopu à e midterms ? E midterms sò l’ultime elezzione senaturiale à i Stati Uniti. Sébatien Bonifay hà publicatu u libru “Not born in the USA”, u racontu di un scontru cù scrittori americani chì contanu l’America operaia è pupulare. Pè cumpletà a prugrammazione, una masterclass nant’à i presidenti di a quinta republica à u cinema, una cunferenza è attelli di scrittura pè i cullegianti di Biguglia. I rispunsevuli di u festivale speranu cusì sveglià a cuscenza citadina di sti giovani è dalli elementi pè capì u mondu.

 U prugramma di Camera pulitica è e riservazione nant’à https://camerapulitica.fr/