Nutiziale culturale

I laureati di u premiu di u libru corsu 2024 onorati sabbatu u 12 d'ottobre in Bastia

Sylvain Gregori, Ghjuvan Ghjaseppiu Franchi, Flavia Mazelin-Salvi, Ghjacumina Geronimi, autore di “Scumbugliu in l’universu” à l’edizione Adecec-Eoliennes, Paula Bussi è Antoine Noble Marchini riceveranu u premiu di u libru corsu à u palazzu di i guvernadori in Bastia sabbatu u 12 d’ottobre durante una ceremunia officiale. À tempu, seranu festighjati i 40 anni di stu premiu creatu da piunieri bramosi di mette in risaltu a pruduzzione litteraria di l’isula. Cusì, tutti l’anni, sò distinti rumanzeri, storichi è pueti chì contanu a Corsica in corsu è francese.

Publichendu una mansa di documenti novi trovi in l’archivii dipartimentali è privati, ma dinù in u serviziu storicu di a difesa in Vincennes, u storicu Sylvain Gregori porghje infurmazione nant’à a seconda guerra mundiale cù u libru “Nouvelle Histoire de la Résistance en Corse”, edizione Piazzola. St’ultimu studieghja a situazione nata da a guerra insistendu nant’à i raporti trà a resistenza è una sucetà isulana trà disprezzu di l’italia è simpatia pè l’inghilterra. L’autore mostra cumu stu cunflittu, cum’è quellu di a prima guerra mundiale, l’occupazione taliane è alemane anu riassestatu i cuntorni di l’identità isulana. In stu quadru, l’ADECEC  v’invita à una cunferenza di Sylvain Gregori u 23 di nuvembre, sala cumunale. 

Flavia Mazelin-Salvi cù “Francardo Nagori” à l’edizione Punto è basta ramenta a zitellina è u paese prutettore grazia à a frittata fatta cù u brocciu è a menta. À tempu a memoria olfattiva di l’antenati è a nustalgia di e radiche. 

U spiritu di a lingua corsa cù e so parolle, spressione, pruverbi, i canti chì l’anu ammanita dapoi seculi è seculi è li danu a so identità propia. Eccu a sfida di Ghjuvan Ghjaseppiu Franchi in Mythologies d’une langue, edizione Albiana. L’autore, persunalità di u riacquistu è animatore di a rivista Rigiru si fonda nant’à a sociolugia è l’etno-storia cù i temi di l’acqua, l’amore, a morte.

Dopu, Ghjacumina Geronimi autore di “Scumbugliu in l’universu” à l’edizione Adecec-Eoliennes, s’addunisce cù l’illustratrice Paula Bussi pè splurà i misteri di notte di l’universu. Sò trattati temi universali di fratellanza, d’umanità, chì arricchiscenu l’imaginariu di i zitelli. Avemu dinù a bellezza di l’opera chì cumpleta un testu affascinante. In sta notte magica di l’universu, Ghjacumina è Paula facenu luccicà l’ochji di i più chjuchi. 

Infine, u premiu di u libru corsu hà attribuitu una menzione speciale à Antoine-Noble Marchini pè “ Le temps, la confiance, l’argent… Giuseppe Gregorj, marchand banquier en Corse (XIXu seculu)  edizione Albiana. Studiendu l’econumia di a Corsica à principiu di u 19u seculu à parte da l’archivii privati di u banchieru Gregori,Antoine-Noble Marchini presenta una pruspettiva nova nant’à e trasfurmazione ecunomiche è suciale di un’epuca induve stu banchieru hè à tempu attore è testimone. Hà avutu un rolu maiò palisendu trà l’influenze taliane è francese, l’ambizione è l’imbusche d’una sucetà scuprendu l’arcane di u negoziu à traversu u secretu bancariu illustrendu cusì u rolu di Bastia in l’epuca di a risturazione. Un sugettu mai trattatu nanzu. Un libru fundamentale pè a cunniscenza di a storia isulana.

Dopu a rimessa di i premii, duie cunferenze sò previste: “La gravure, un moyen de diffusion des canons du Baroque continental italien dans la peinture corse” cù Michel-Edouard Nigaglioni, storicu di l’arte. “Marins et marchands entre Corse et terra ferma (XVIe – XVIIIe siècles)” cù u storicu Jean-Christophe Liccia.