Nutiziale culturale

A mostra « À Libru Apertu » da u 22 à u 24 di maghju in citadella di Calvi

Sta sesta edizione v’aspetta cù i so attelli, scontri, dediche è animazione di rigalu. Autori, illustradori, editori è famiglie anu da celebrà a ricchezza di a litteratura pè a giuventù in corsu è francese. Un appuntamentu organizatu da u Svegliu Calvese.

E duie prime ghjurnate sò pè i sculari : più di 800 elevi participeranu à attelli di scrittura, di disegnu, di tipugrafia è di lettura animati da ottu autori-illustradori invitati, frà elli Nathalie Dieterlé, Maxime Derouen, Gaëtan Dorémus, Paula Bussi è Stéphane Conca… Cusì i zitelli puderanu infurmassi nant’à a creazione litteraria, i libri, cù artisti ricunnisciuti. U sabbatu 24 di maghju, a mostra s’apre cù un dopu meziornu festosu è gratisi da duie ore à sei ore in sfarenti lochi di a citadella. À u Garage de la Légion, sò previsti dediche, panconi d’editori è spaziu di lettura. Un cuncorsu di disegnu è una caccia à tesoru sò pruposti à i zitelli, mentre chì a ludoteca di Bastia animeghja ghjochi diversi à a Pulverera. E famiglie puderanu scopre dinù un ghjocu di l’oca tamantu, participà à attelli tipugrafichi cù L’Indéprimeuse o scuntrà l’illustratrice Laura Soprano à u museu di l’arti di a citadella di Calvi. Custì, serà inaugurata una mostra d’opere di zitelli fatte durante l’attelli.

L'evenimentu hè dinù u locu di u bislinguismu cù autori, editori corsi è attività valurisendu a lingua è a cultura nustrale. Cusì, vera festa di u libru pè a giuventù, « À Libru Apertu » favuriseghja u scontru, a creatività è a trasmissione, u spartimentu è a scuperta.