Nutiziale culturale

Associu Letia-Catena : Scontri di Letia dumenica u 17 d’aostu à parte da 3 ore

Antoine-Marie Graziani, Jean-Pierre Poli et Erick Miceli presenteranu e so opere è studii à u publicu sta dumenica in Letia, piazza à a chjesa San Roccu à parte da 3 ore. 

Storicu è cercadore, prufessore di l’università, Antoine-Marie Graziani hè l’autore di parechji libri, pè u più di storia è di persunalità storiche. Dumenica si sprimerà nant’à l’invasione turco-barbaresche in Mediterraniu.

Jean-Pierre Poli, avucatu è scrittore, hà scrittu 1769-1789, vingt ans de résistance corse, à l’edizione Alain Piazzola, Premiu di u libru corsu in u 2019. Hà da presentà a riedizione di u so libru Autonomistes corses et irrédentisme fasciste, editatu in u 2007.

Infine, Erick Miceli, storicu è cercadore, duttore in storia muderna à l’università di Corsica è di Genuva pè una cunferenza nant’à e rivuluzione corse è l’idea republicana. Intervenzione in u quadru di i 300 anni di Pasquale Paoli.

D’altrò, dapoi oramai 13 anni, l’associu Letia Catena travaglia nant’à l’edizione d’un novu libru, Mimoria Muntagnola rialisatu da dece intervenanti, ognunu secondu e specialità è cunniscenze. I sugetti rimandanu à a cumunità paisana di Letia, a regione è a Corsica in generale. L’ogettivu hè di riperturià è di trasmette à e giovane generazione l’acquisti, cunniscenze tradiziunale è a memoria di u populu, i valori di e nostre cumunità muntagnole furmati durante l’evenimenti storichi. In stu libru, avemu siti archeologichi, un studiu nant’à i pittori russii è e so opere in Corsica, u ricordu di l’unità inglese di i Corsicans Rangers, un’unità d’infanteria legera di l’armata inglese induve Corsi scumbattianu durante a rivuluzione francese è u Primu Imperu. Infine, in sta Mimoria Muntagnola, si pò truvà un studiu nant’à i segni pè marcà l’animali. U libru serà in vendita dumenica u 17 d’aostu durante sti Scontri di Letia, piazza à a chjesa San Roccu à parte da 3 ore.