Indè noi

Ghjurnata di l’Adecec in Cervioni: S’hè turnatu à sente u soffiu militante di Ghjuvanteramu Rocchi

A ghjurnata di l’Adecec s’hè vulsuta umaggiu à Ghjuvanteramu Rocchi, u militante, u pueta, u pedagogu. U so soffiu militante ! Soffiu ch’ùn si riduce micca à l’annate settanta, dette di u riacquistu. Soffiu chi si vole rispiru, un ansciu,  a cuntinuità di a vita.

Issu soffiu militante in a cultura di a globalisazione oghjinca hè più ch’una resistenza hè a perennità di ciò chè no simu. Ci indetta a strada à seguità : cuntinuemu à parlà è à scrive in corsu. Dimmu quantu a lingua corsa, hè viva. Issa ghjurnata hè stata dinù dédicata à Pasquale Marchetti, omu di scrittura è di riflessione di u Murianincu, chì anch'ellu si n’hè andatu lasciandu un'opera di qualità. A sala colma s’hè arrizata in cumunione.

Rende umaggiu à Ghjuvanteramu Rocchi era di dà a parulla à quelli chi anu fattu un pezzu di strada à u so latu… è d’apre a ragiunata à l’insignamentu di u corsu è a piazza di a lingua corsa in a sucietà isulana.

Hè cusi chi Mattea Lacave hà ramintatu a fiaccula di a so vita. Issa fiacula chi hà purtatu Ghjuvanteramu à scrive, à parlà, à cantà, à sparte, à trasmette.

Sonia Moretti, s’hè impuntellata  a l’opera diviziosa « Battistelle » è  u travagliu spartutu cun Ghjuvanteramu Rocchi chi currispondia à entre in un tempu foltru, di dumande, di cuntrastate, di cunfronti d’idee è di smeravigliata pettu à un omu fattu da u so rapportu à u so mondu, in quistiunamentu perpetuu à prò di a lingua è di ciò ch’ella pudia porghje à ogni zitellu.

Cun Ghjispeppu Turchini, s’hè sappiutu à chì ne simu oghje chì ghjè oghje di l’insignamentu di u corsu, additendu e realità d’un bilanciu ch’un n’hè micca esente di difficultà.

Lisandru de Zerbi, fundatore di l'associu Praticalingua hà prisentatu a struttura chì vole permette l'amparera è a spartera di a lingua corsa, per mezu di a so pratica in immersione.

Altri anu fattu sente a so voce per u pueta è u pedagogu. Shè cusi intesa una puesia di Guidu Begnini « Porta Voce », a testimunienza di Stéphanie Raffini, giovana stitutrice per quellu chì avia l’arte d’amparà è tramandà u so sapè. E dinù i versi di Ghjuvan Paulu, l’amicu paisanu cusi cumossu.

Più tardi, in cunventu di Cervioni, toccava à Feli di rende umagiu à u so cumpagnu di strada, nanzu di sparte a scena cun Canta u Populu Corsu, cun l’aiutu di l’acque d’Oerzza. D’issi cuncerti chi rallegravanu u pueta.

« L’avvene hè bellu » dicia Ghjuvanteramu Rocchi, è l’avvene appartene à quelli chi u sunnieghjanu. L’hà detta Ghjiseppu Turchini : «Ghjuvanteramu facia di i so sogni una realità. A noi dinù, nù e scole, in carrughju,  di praticà è di fà d’ista lingua una brama, un bisognu, un ernese, un utopia, un’apertura à l’altru, una manera di dì u mondu è seremu salvi, uniti, fieri è spannati».

L’umaggiu à Ghjuvanteramu si prusegue in Cervioni, à l’occasione di e ghjurnate di u patrimoniu, induve seranu présidente à u publicu, duie mostre chi contanu a vita di u pueta di l’Oretu.