Nutiziale culturale

Ghjurnate di a lingua materna da u 10 à u 26 di ferraghju à l'università di Corsica

Pè a Ghjurnata Internaziunale di a Lingua Materna, l'Università di Corsica festighjeghja l’evenimentu mundiale à prò di a prumuzione di a diversità linguistica è culturale. U stabilimentu hè impegnatu à prò di a valurisazione di e lingue materne presente in i campus universitarii è u territoriu. St'impegnu s'affacca cù a furmazione, in particulare, in u quadru di l'attività di u dipartimentu di e Lingue pè Specialisti d’Altre Discipline è dinù cù a ricerca cundutta à u Laburatoriu Lochi Identità eSpazii è Attività (Università di Corsica-CNRS).

Pè l’annu 2026, l’Università prupone una prugrammazione ricca da u 10 à u 26 di ferraghju, cù attelli ghjuvendu à a cumunità universitaria è azzione di ricerca nant'à a riprisentazione di e lingue ind'a sucetà. Grazia à sta prugrammazione, l’Università brama di rinfurzà a so leia à u territoriu è a cuuperazione internaziunale cù l'Italia.