Nutiziale culturale

Mostra 'Nuragica' à u Museu di l'Alta Rocca in Livia sin’à u 30 di settembre

In u quadru di i 150 anni di a ricunniscenza di l’età di u Bronzu, u museu di l’Alta Rocca accoglie a mostra evenimentu Nuragica sin’à u 30 di settembre di u 2026. Porta i visitadori in core di a cultura nuragica sarda è cù  i so ligami cù a sucetà turrena corsa, mill’è cinque centu anni nanzu a nostra era. À traversu ricustruzzione spettaculare è una storia passiunante, Nuragica offre una sperienza multimedia è sensuriale di prima trinca, mischjendu sapè scientificu è emuzione. Grazia à ricustituzione mantenendu e dimensione vere di e tombe di i giganti o di e torre nuragiche, rinasce una di e più anziane è misteriose sucetà mediterranie. Nant’à un percorsu innuvente, trà decori reali è virtuali, i visitadori facenu un viaghju affascinante in u tempu in core di a storia di a civilisazione nuragica.

Risultatu di un travagliu cumunu trà sperti corsi è sardi, i cuntenuti di Nuragica sò stati arricchiti cù elementi nant’à l’evuluzione di a Corsica, i so cuntatti è e so sumiglie cù a Sardegna. Cù un modu di narrazione originale, didatticu è a rialità virtuale, l’evenimentu permette d’interessà un publicu d’ogni età è origine cù l’ambizione di fà vene novi publichi in i musei. Nuragica hè una mostra itinerante principiata in u 2017 chì hà avutu assai successu in Sardegna è in Italia. Hè cuncepita è rialisata da cuuperativa culturale Nova Istoria.