Nutiziale culturale

I dece anni di u festivale Libri Mondi à u museu è à u palazzu di i guvernadori in Bastia da l’11 à u 13 di settembre

Dapoi oramai dece anni, Libri Mondi si fonda nant’à unepochi di principii : accoglie pochi scrittori è scrittrice pè dalli tutta a piazza chì a so opera merita, prupone scontri cù entrata di rigalu è fà tuttu pè chi ogni persona curiosa assisti à scontri litterarii. A litteratura ùn si cunfischeghja micca. Appartene à tutte è tutti. Sta passione si ritrova dece anni dopu à u palazzu di i guvernadori di Bastia induve u publicu d’ogni origine, classa suciale è percorsi si scontra è s’imbuleghja. In u 2026, sò aspettati dui premii Goncourt Jérôme Ferrari è Laurent Mauvignier pè u scontru trà i dui venneri l’11 di settembre, à 7 ore, è scontri cù l’invitate è invitati di st’edizione anniversariu : Marcu Biancarelli, Carole Martinez, Laird Hunt, Iegor Gran, Olivier Ciechielski è Adèle Yon.

Jérome Ferrari hè scrittore è traduttore chì hà ricevutu u Premiu Goncourt in u 2012 pè u rumanzu “Le serment sur la chute de Rome” è u premiu litterariu di u giurnale Le Monde in u 2018 pè un altru rumanzu ‘A son image”.

Laurent Mauvignier hà ricevutu u premiu goncourt in u 2025 pè u rumanzu “La maison vide”. In u 2006, ottene u premiu di u rumanzu FNAC pè u so libru “Dans la foule”. In u 2015, hà scrittu a pezza “Retour à Berratham”, premiu Émile-Augier 2016, attribuitu da l’Accademia francese.

Marcu Biancarelli chì volta nant’à a scena litteraria. Hè rumanzeru, puetu, autore dramaticu, traduttore, scrittore, editore. Hà scrittu un’opera prufonda è singulare nant’à a memoria è a viulenza di un’isula. H ricevutu u Premiu di u libru isulanu d'Ouessant in u 2001 è u 2002. Autore frà altru di “Prighjuneri”, 51 Pegasi, astru virtuali », Murtoriu : Ballade des innocents, Extrême méridien, [« Stremu miridianu »

Carole Martinez hè una rumanzera francese ch’hà ottenutu u premiu Goncourt di i liceani 2011 pè “du domaine des murmures” è parechji premii litterarii in u 2007 pè u so primu rumanzu “Le coeur cousu”.

Laird Hunt hà scrittu ottu rumanzi in a categuria di u rumanzu neru, u grande rumanzu americanu, a finzione storica o u rumanzu d’orrore.

Iegor Gran, unu di i scrittori i più comichi di a nostra epuca, chì si fonda nant’à a surpresa è u ghjocu. Hà ricevutu u Grande Premiu di l’umurismu neru pè u libru ONG in u 2003.

Olivier Ciechelski hè scenaristu, hà scrittu è rialisatu parechji filmi corti è documentari. Insegna u scenariu è hè script doctor pè migliurà un scenariu quandu ci hè bisognu. Hà pruduttu parechji documentarii pè France Culture. Infine, “Feux dans la plaine” hè u so primu rumanzu.

Adèle Yon hà publicatu u so primu libru “Mon vrai nom est Elisabeth” in u 2025, chì prulunghjeghja e so ricerche di nanzu pè dà una voce è una dignità à a so arcimammone Betsy, diannusticata schisufrena.