Nutiziale culturale

VIIIa Camerata Figarella, festivale di musica classica è tradiziunale, da u 18 à u 27 di settembre

Dapoi u 2019, a vucazione di a Camerata Figarella hè d’offre una sperienza culturale di prima trinca nant’à u territoriu, in particulare pè a ruralità. Cusì, Camerata Figarella organiseghja à a fine di settembre un Festivale di listessu nome chì entre in u quadru d’una stagione musicale è d’una creazione dinù musicale in leia cù u patrimoniu è a lingua. Addunisce musicanti d’orchestri, sulisti internaziunali è giovani talenti corsi, mediterranii è europei. Cum’è allusione à e rilazione culturale è linguistiche trà a Tuscana è a Corsica, u nome di l’associu s’ispira di a Camerata Fiorentina, cunnisciuta durante u Rinascimentu talianu, cum’è un locu di scambii è di creazione artistiche. Figarella rimanda à u paisolu di a cumuna di Santa Maria di Lota in Capicorsu induve campanu è sò originarii i fundadori di l’associu.

Sedeci cuncerti sò previsti dunque da u 18 à u 27 di settembre in parechje cumune di Cismonte, frà elle Cervioni cù La Banda ! Da l’opera di Verdi è Puccini à e musiche sacre di l’Italia meridiunale ghjovi u 24 di settembre in a catedrale San Teramu à 8 ore. Camerata Figarella serà dinù in Ruglianu, Corti, Luri, Purettu è Castellu, paisoli di Brandu, a Pieve di Lota, U Borgu, E Ville di Petrabugnu, Prunelli di Fium’Orbu, Pigna è Nonza. Pè apre u Festivale, si celebrerà l’800 anni di San Francescu d’Assisi cù u gruppu Micrologus di Patrizia Bovi, è u so magnificu prugramma “Francesco, la natura e il divino”.

Dopu, ci serà un omagiu à a tradizione mediterrania di e bande di fiati è di e fanfàre cù dodeci virtuosi di trumbette, trombe…. Lascita di l’armate ottomane è napuleuniane, fiati è fanfare anu permessu, durante u XIXu seculu, di trasmette u grande ripertoriu d'opera talianu è d’esse testimone creativu di u fervore musicale di e prucessiò è di e feste patrunale è religiose. Serà accolta dinù a viuluncellista cureana Hayoung Choi, primu premiu à u cuncorsu Regina Lisabetta, pè cuncerti di musica di camera fendu sente arie di Brahms è Schubert, ma dinù una creazione nova, Encounterpoint, mischjendu a musica di J.S Bach è di Nina Simone, vicin’à Anthony Caillet è Noé Clerc, sulisti di jazz è cumpunidori. A Camerata Figarella hà da primurassi dinù di a trasmissione pedagogica pè i sculari, i giovani studianti di u Cunservatoriu Henri Tomasi è infine pè u publicu cù cunferenze di rigalu. À ogni cuncertu di a Camerata Figarella, l’associu prupunerà parechje volte in l’annu prugetti cù giovani pè trasmette è fà scopre altrimente a musica ch’ella sona, e so leie cù a storia, a litteratura, l’arte… Fà a leia cù e generazione più giovane grazia à prugetti originali pè addunissi ingiru à un patrimoniu cumunu.

Cusì, à mezu à fanfare taliane, capi d’opera di a musica classica, creazione nuvelle in giru à Bach è Nina Simone, cantu è teatru musicale, u Festivale ci conta d'un annu à l'altru, a grande storia di e musiche sapiente è tradiziunale.

Prugramma : https://www.cameratafigarella.com/ 

Riservazione :  https://www.helloasso.com/