Nutiziale culturale

Currilingua quinta edizione, sabatu u 17 d’ottobre da Cavru à Aiacciu

Sabatu u 17 d’ottobre da Cavru à Aiacciu, serà a quinta edizione di a Currilingua, a corsa di a sulidarità pè a nostra lingua. Si corre per fà a prumuzione di a lingua corsa, è cù i soldi ammansati si sustene l’iniziative à prò di a so amparera è a so prumuzione. À l’iniziativa di u cullettivu Parlemu Corsu, tutti l’anni, sò chjamati à iscrìvesi associ, sindicati, squadre spurtive, scole, imprese, o puru gruppi d’amichi. A scrizzione costa 100 euri. Ognunu corre (o marchja) unu o parechji chilometri, cum’ella li pare, è i participanti si passanu un testimone, da a partenza sin’à a ghjunta. Quist’annu si parte da Cavru à 2 ore è si ghjunghjerà in Aiacciu versu 7 ore è mezu.

I participanti devenu rialisà un chilometru in particulare postu chì hè una corsa cù un passagiu di testimone per custruì una catena di sulidarità chì mai si rompe, ma ponu corre di più chè un chilometru s’elli volenu. Ci pò esse unu o parechji curridori chì riprisentanu “un’entità”. St’entità pò esse una persona individuale o un gruppu d’amichi, un pìcculu cumerciu o una grossa impresa, un associu culturale o un associu spurtivu, a cuuperativa d’una scola o una cumuna, ancu un sindicatu ma micca un partitu pulìticu…
I soldi  aiutanu à finanzà prugetti à prò di a lingua corsa. I prugetti digià sustenuti sò purtati da associ : Fiuramossa, Scola Corsa, Basta à parlà, I Scontri di Cathy, Morra Murrina o purtati da u cullettivu Parlemu corsu (Rubutiscola, Furmanima, Chì si faci ?) A Currilingua sò digià quattru edizione, à mumenti averanu fattu u giru di a Corsica. Dunque, voi dinù venite à participà ! •

Iscrizzione : https://www.parlemucorsu.corsica/cc/a-currilingua/