Nutiziale culturale

I 50 anni di l’Evenimenti d’Aleria

L’occupazione d’una cantina viticula da militanti di l’ARC (Azzione regiunalista corsa) cundutti da Edmond Simeoni i 21 è 22 d’aostu, s’hè compia cù a morte di dui pulizzeri è un militante autonumistu gravamente feritu. Ghjè l’attu fundatore di u naziunalismu corsu mudernu. A tempu, i militanti anu spartu fora di l’isula e rivindicazione autonomiste in un cuntestu di rumpitura trà una parte di a sucetà corsa è un Statu chì risponde in modu troppu ripressivu à l’occupazione di a cantina Depeille. St’occupazione era pè dinunzià a distribuzione da a SOMIVAC (Sucetà d’assestamentu pè a messa in valore di a Corsica) di a magiurità di terreni di a piaghja orientale à i pedineri d’Algeria è u scandalu di u vinu à u bastone. 

Pè Edmond Simeoni, dopu st’evenimenti, u Statu hà creatu trè statuti particulari pè l’isula ma micca suddisfacenti. E cunsequenze pusitive d’Aleria sò a creazione di a SAFER (Sucetà d’assestamentu fundiariu è di stabilimentu rurale), a Cuntinuità territuriale, u votu pè procura chì hà rimpiazzatu u votu pè currispundenza, a fine di a culunisazione agraria di a SOMIVAC è quella turistica di a SETCO (Sucetà pè l’equipamentu turisticu di a Corsica). Dopu, e lotte si sò sparte è rinfurzate cù a creazione di u FLNC in u 1976.

50 anni dopu, ùn si sà micca tuttu nant’à Aleria è ciò hè accadutu in u so filu. I storichi è i giurnalisti ci travaglianu sempre. U naziunalismu hè firmatu un puntellu di a storia corsa à livellu istituziunale o clandestinu. Malgradu e divisione, a guerra trà naziunalisti, sò stati eletti à u putere dapoi quasi dece anni à a Cullettività di Corsica. In u 2025, simu in un prucedimentu longu pè l’autonumia di l’isula chì s’appronta à una tappa decisiva à u Parlamentu.