Nutiziale culturale

Prima notte di a paghjella in Lama l’ondeci di lugliu

À l’iniziativa di Ghjuvan Francè Luciani, membre di i Muvrini, a prima notte di a paghjella s’hà da tene l’ondeci di lugliu in Lama. Tutti i cantadori di paghjella, anziani o ghjovani, cunnisciuti o micca, di Cismonte o di Pumonte, sò invitati…

stu cantu pulifonicu face a so strada in Corsica dapoi l’epica di u riacquistu bench’ella sia praticata dapoi sempre in Cismonte, masimu a Castagniccia è u Boziu. Un arte chì cunnosce qualchì difficultà oghje malgratu a so entruta à u patrimoniu immateriale di l’Unesco in u 2009. Ùn si contanu micca, dapoi u riacquistu, i praticanti ma, à spessu, a paghjella diciaremu « sputica » si perde ind’un arte induve l’esteticu piglia, oghje, a suprana nantu à l’estru. Ci eranu, tempi fà, cuncorsi di paghjella ma a manifestazione hè sparita. Fermanu attelli di cantu induve s’ampara à impaghjellà, un arte chì dumanda assai sforzi (pratica, ascultera…).

Hè per reabilità iss’arte in a so dimensione a più pura, permette à i praticanti di ritruvà si per scambià è sopratuttu cantà, ch’ella hè nata a prima « Notte di a paghjella », l’ondeci di lugliu in Lama. « L’anziani spariscenu, spiega Ghjuvan Francè Luciani, membre di u gruppu I Muvrini è cantadore di paghjella à l’origine di a manifestazione, certi anu tramandatu u so arte, d’altri nò. È ci mancanu appena i spazii per a pratica. Hè per quessu ch’avemu vulsutu urganizà issa prima notte di a paghjella da adunisce u più di cantadori pussibile, ognunu cù a so manera di cantà è pocu impreme d’induve ellu vene. »

Ci eranu, tempi fà, assai paesi di Corsica induve s’impaghjellava. I più cunnisciuti, forse per via di u riacquistu, sò Sermanu è Rusiu, paesi di u Boziu è dinò Tagliu per via di i fratelli Bernardini di I Muvrini, ch’amparonu iss’arte quì cù u so babbu Ghjuliu. Ma ci vole à sapè chè a paghjella era praticata in tutti i lochi di u Boziu, a Castagniccia, a Tavagna, ancu in l’Aschese (versu stranu), Castiglione è a Balagna...Ùn si sà, à dilla franca, s’ella esistia altrò (forse micca). D’altronde, e missione etnugrafiche di Felice Quilici (anni quaranta, cinquanta è sessanta), permettenu di cunnosce versi antichi di tutti issi lochi. Ghjè un pocu di tutti iss’ambiu quì chè Ghjuvan Francè Luciani hà vulsutu mette in vale urganizendu a serata di l’ondeci di lugliu.

« Sò d’Erbaghjolu, aghjusta l’artistu, ma avemu urganizatu issa notte in Lama, d’induve hè a mo moglia. U scopu hè di ritruvà, in un cuntestu naturale, un ambiu festivu cù ghjente chì praticheghjanu a paghjella, pocu impreme u « nivellu », amatori o cunfirmati. Una stonda piacevule per tutti. »

Petru Pà Gori, chì hà creatu a famosa pagina Facebook « Ricordi di Petru Pà » -vechji canti antichi micca solu polifonichi- serà prisente per filmà a serata.  Cantadori rinumati o micca, principianti è cunfirmati, omi o donne-chì iss’arte li hè ancu dedicatu oghje- sò aspettati à u caffè « L’Ostri », in Lama, l’ondeci di lugliu à sette ore di sera per impaghjellà ognunu u so versu.

Origine : Journal de la Corse