Nutiziale culturale

Ricordu di Ponte Novu l'8 di maghju

Dui centu cinquanta sei anni fà, Pasquale Paoli è li so suldati pirdianu a battaglia di Ponte Novu contru à l'armata francese di Luigi Piombu. Ogni annu, l'associu Ricordu di Ponte Novu, criatu in u 1972 urganizeghja un ghjornu di cummemurazione. Hè statu ripigliatu deci anni fà da una squadra di giovani chì s'impegna pà rinvivisce u ricordu di sta scunfitta, elementu impurtantissimu di u patrimoniu storicu corsu mudernu.

Pà u presidente di l'associu, stu ghjornu di cummemurazione ùn ghjova micca solu à rende umagiu à i morti ma ancu à fà cunnosce a storia di a Corsica. 'Ci hè sempre st'idea di tramandera, ancu ind'è l'associu o u ghjornu stessu cù i zitelli. Hè assai impurtante per noi chì e generazione nove capischinu è piglienu cuscenza di ciò chì s'hè passatu quì.'

E ùn vale solu pà i naziunalisti, sigondu ellu.

'U ricordu di Ponte Novu, cum'è no' l'avemu sempre detta, è pensu ch'elli a dicianu ancu quelli chì a facianu tandu, hè fattu pè tutti i Corsi. Ch'elli sianu maiò, chjuchi, zitelli, criature, vechji, pocu impreme l'upinione pulitica. U ghjornu di l'ottu, ghjè pè tutti i Corsi. Simu tutti uguali è avemu tutti antenati chì sò stati impegnati in stu ghjornu funestu, da luntanu o da vicinu. Ghjè pè quessa ch'e no simu tutti ingiru à stu ponte, pè ramintà, ramintà ciò chì s'hè passatu in un spiritu di spartera è di tramandera.' 

L'associu v'aspetta pè una ghjurnata di memoria è di storia ghjovi l'8 di maghju di u 2025, pè rende un omaggiu à quelli eroi cascati per a nostra Libertà, è vultà nant'à più di 250 anni di resistenza.