Nutiziale culturale

Cuncertu annuale Spiritu sacru à a Catedrale Santa Maria Assunta d’Aiacciu sabbatu u 18 d’ottobre à 9 ore

A squadra di a radiu RCF Corsica urganizeghja, issu 18 d’ottobre à a Catedrale Santa Maria Assunta d’Aiacciu, a seconda edizione di u so cuncertu annuale : Spiritu Sacru. Un cuncertu, cum’è quellu di l’annu scorsu, dedicatu à a radiu è chì li permetterà di sviluppà si.

Racoglie fondi à prò di a radiu, eccu dapoi qualchì annu, unu di i scopi di a squadra di RCF Corsica. Prisente inde l’isula dapoi u 2008, issa radiu guarantisce tutti i ghjorni, quattru ore è mezu di prugrammi, senza publicità. « Semu una radiu assuciativa, spiega Yannick Augé-Ottavi, presidente di a struttura, è avemu di sicuru pochi mezi per campà è assicurà u nostru sviluppu. Da racoglie fondi, avemu u « radiu don », i fondi di u Ministeru di a cultura, a Ghjesgia è ciò ch’elli danu l’auditori. »

Da andà più luntanu, a squadra hà circatu un altru cuncettu. Ma ci vulia à truvà ne unu, liatu di sicuru, à a spiritualità. Cusì, hè natu, l’annu scorsu, u primu cuncertu « Spiritu Sacru », urganizatu à a catedrale d’Aiacciu. « U cuncettu, aghjusta u presidente, era di lià, ind’un prugramma di qualità, cantu classicu è pulifunia sacra. Tandu ci fù a curale di a Catedrale, l’organu cù u tintu prete Fini, trè cunfraternite (San Roccu, u Prunelli è Peri) è a mandulina di Stefanu Pinelli in prima parte. Dopu, a squadra di u Coru di Sartè per più d’un’ora chì avianu incantatu l’assemblea. 

L’idea hè stata dunque seguitata questu annu per una seconda edizione dedicata, sta volta, à a Vergine : Evviva Maria ! « A Vergine, preciseghja Letizia Pietri, direttrice di a Radiu, hè a Regina di a Corsica. Eppo, hè dinò a Santa Patrone d’Aiacciu. A Catedrale li hè dedicata. Avemu sceltu di mette in piazza sta tematica, ci permette d’avè una cuerenza ind’a nostra prugrammazione. »

Tandu, l’idea ùn hè stata scambiata per l’edizione 2025 chì s’hà da tene u 18 d’ottobre. Una parte dedicata à u classicu è un’altra à a pulifunia sacra. Ma si principierà cù i Cm1 è Cm2 di a scola di San Ghjiseppu d’Aiacciu cù duie canzone : Hallelujah è Hosanna di Ghjacumu Culioli. Si seguiterà cù Jeremie Vuillamier (organu) è a cantatrice Michelle Canniccioni, a struttura Ad Amore (cantu, cetera è viulinu cù Carminu Belgodère, Laurence Babiaud, Filippu Caviglioli è Ghjuvan Ghjacumu Ottaviani). In seconda parte, u Coru di a ghjesgia di San Roccu, e cunfraterne Santa Croce di Vicu, Santa Croce di Furciolu è di u Panicali è a Compagnia del Santissimo Sacramento di Sartè. Tutti cù canti dedicati à a Vergine Maria o canti di a Passione.

« L’idea, aghjusta Yannick Augé-Ottavi, hè di scrive issu cuncertu à longu andà, sempre cù u listessu spiritu. Ma scambiendu ogni volta a tematica è aghjustendu d’altre cunfraternite...U scopu serà, perchè micca, d’apre issu festivale à d’altre strutture aldilà di a Corsica (Uccitania, Sardegna, Tuscana, Sicilia…) da urganizà un cuncertu maiò...Ci travagliemu. »

In a seguita di u cuncertu, a radiu RCF Corsica hà da participà, à a metà di nuvembre, à a manifestazione naziunale : u « Radio Don », chì permette, dinò di racoglie fondi in tutte l’antenne RCF. « In Aiacciu, semu una piccula radiu d’avvicinera, spiega torna Letizia Pietri, cù cinque impiegati (trè ghjurnalisti, una sicretaria, un tecnicu…), tutti à mezu tempu. Trattemu di tutti i sughjetti di l’attualità, emissione spirituale, ecc...I mezi sò pochi, masimu chè i bisogni in materiale, crescenu dinò tutti l’anni. »

Intantu, a squadra spera a listessa participazione chè l’annu scorsu à l’occasione di a seconda edizione di « Spiritu Sacru ». Fora di issu cuncertu, sempre à listessa epica, a radiu cerca dinò à fà a so prumuzione intornu à l’adasgiu chì a caratterizeghja : « Spartimu a gioia ». Un’idea chì face a so strada è chì puderà sbuccà ver di un spettaculu maiò cù artisti rinumati nanzu o durante l’estate 2026, intornu à a gioia « Travagliemu à nantu è forse puderà esse urganizatu l’annu prussimu. L’idea hè di sviluppà issu dui cuncerti tutti l’anni. »