Nutiziale culturale

Festi lingue i 27 è 28 di ghjugnu in Ventiseri

Durante dui ghjorni, da 11 ore di mane à mezanotte, Festilingue hà da celebrà a nostra diversità linguistica è culturale nant’à u situ di l’anziana usina di U Travu in Ventiseri. L’ADECEC ci participerà cù i so ghjochi anziani è arnesi di u museu Anton Dumenicu Monti. Artisti, autori, cumpunidori, interpreti, artigiani, musicanti cù i strumenti di u so paese, associ, uffizi di u turismu sparteranu u so patrimoniu in musica. Organisatu da l’associu Eventissimu presidatu da Evelyne Adam cù u sustegnu di a municipalità, Festilingue vole fà capì l’impurtanza di a priservazione di e lingue è di e culture regiunale pè e generazione future.

A u prugramma : scuperta di u patrimoniu di e lingue regiunale è minuritarie, sapè fà artigianale cù artigiani di Corsica è d’altrò. Si puderà scopre è tastà prudutti regiunali. Artisti è musicanti feranu scopre e so opere rispechjendu l’identità culturale è e storie di i so paesi. Avemu dinù associ impegnati in a difesa di e lingue regiunale in Corsica, Paese bascu, brittonu, Occitania è scrittori di ste lingue. Infine, cuncerti venneri u 27 di ghjugnu à 8 ore : a basca Anne Etchegoyen, à 9 ore è mezu u gruppu Eppo. U 28 à 7 ore, Soledonna, à 8 ore a canterina occitana Séverine Bonnin chì invita Doria Ousset è Anna Rocchi. A 9 ore è mezu, u gruppu brittone Manau è u fest noz (addunite di feste di paisani brittoni) à i culori di a tribù di Dana. Riservazione nant’à corsebillet.co