Nutiziale culturale

Università Statinale di Teatru da u 5 à l'8 di ghjunghju

Da u 5 à l’8 di ghjugnu 2025, u Centru Culturale Universitariu è l’UMR LISA (CNRS / Università di Corsica) organiseghjanu a prima Università Statinale di Teatru, in lingue corsa è minuritarie. Un evenimentu gratisi è per tutti arradicatu in Corti ma dinù versu l’internaziunale cù creazione cuntempuranea, trasmissione culturale è impegnu linguisticu.

L’evenimentu s'iscrive in u filu di e prime università d’estate chì, nanzu a riapertura di l’Università di Corsica in u 1981, avianu postu i fundamenti d’un rinnovu culturale isulanu, i cicli iniziati da Ghjacumu Thiers in u CCU.

A u prugramma, nove spettaculi, trè reunione è attelli di pratica teatrale. Sette riprisentazione seranu ghjucate in lingua corsa – certe bislingue –, una in occitanu è un’altra in galizianu, traminduie tradutte… in corsu.

A prugrammazione di l’università statinale di teatru si fonda nant’à un’opera teatrale di Ghjannettu Notini in u 1930, riprisentante di u teatru corsu tradiziunale, una rilettura di A Rimigna, simbulu di u Teatru Paisanu in l’anni 1970, o ancu un’adattazione di u dramu A l’uscita di Pirandello, fundatu nant’à a piazza di a donna ind’a sucetà corsa. Hè previstu dinù u teatru pè i giovani cù un’opera corsa piena di macagna ghjucata da l’elevi di a scola Sandreschi in Corti. Altre creazione trattanu di temi diversi : a viulenza, a curruzzione, a migrazione, a memoria, u putere o a paura – sempre in una lingua forte, viva.

L’evenimentu hè organisatu cù maitinate da dece ore à meziornu cunsacrate  à attelli di pratica teatrale pè tutt’ognunu à a Facultà di Lettere ; i dopu meziorni à parte da duie ore, reunione à l’UMR LISA, cù cercadori, artisti è specialisti ; durante e serate averemu spettaculi prugrammati à u Spaziu Natale Luciani è à u FRAC di Corsica, à 6 ore è à 9 ore.

Pè i giovani, ci sò azzione di mediazione ghjovi u 5 di ghjugnu à duie ore è mezu pè l’elevi da a scola materna à u liceu. D’altrò, unu di l’ogettivi hè di fà cunnosce fora di l’isula a creazione in lingua corsa. fora di u teatru, l’università statinale hè in leia cù u prugettu  RIME Lab / Tourism’Lab, sustenutu da u Prugramma d’Investimentu d’Avvene-UNITI pè a trasfurmazione à prò di i territorii isulani mediterranii direttu da l’Università di Corsica. Averemu sguardi cruciati trà cercadori, artisti, publichi è prufessiunali pè una riflessione cumuna nant’à a piazza di e lingue minuritarie ind’a creazione cuntempuranea. «Ind’un mondu induve e tennolugie nove unifurmiseghjanu l’imaginarii, a pruduzzione è a diffusione di l’opere in lingue minuritarie diventa un attu di resistenza », spiega Davia Benedetti, maestra di cunferenze in antropolugia è direttrice di u Centru Culturale Universitariu. L’entrate à l’università statina sò gratisi, senza riservazione, pè un publicu curiosu, corsu o d’altrò, passiunatu o nò di teatru. Quì, a lingua ùn hè micca un ostaculu ma u principiu di scontru.