Nutiziale culturale

I vintisettesimi scontri musicali di u Mediterraniu

Da u 2 à u 7 di nuvembre, parechje cumune isulane anu da campà à u ritimu di e musiche di u Mediterraniu. Per sta 27 ima edizione i spettatori puderanu apprezià e perfurmanze di musicanti venuti d’Algeria, di Spagna, d’Italia paese invitatu d’onnore, di u Maroccu è di l’Egittu. I cuncerti si teneranu in Bastia à a Casa di e lingue, nant’à u vechju portu induve una scena aperta serà stallata, chjesa Notre Dame de Lourdes è in parechji stabilimenti sculari. Ma dinù in Corti, Biguglia, Ghisunaccia, Tallone, Bunifaziu, Lumiu, L’Isula, Belgudè, Oletta, Petranera, Lucciana.

E sfarente riprisentazione musicale seranu aperte à tutti è di rigalu. Nant’à a quarantina di cuncerti, quasi a metà serà riservata à i sculari cù i so prufessori. U scopu hè di fà scopre à i giovani a musica classica è strumentale. Ma dinù tramutassi in e zone rurale induve l’abitanti ùn anu micca sempre pussibilità di stà à sente sta musica. U centru culturale Alb’Oru accuglierà l’ultima serata cù musicanti di i sette paesi invitati, frà elli i gruppi Eppo, Orizonte, I Surghjenti. Una biglietteria di rigalu, cù piazze numerutate, serà aperta sopr’à locu à parte da mercuri u 28 d’ottobre. Rimarchemu dinù a cunferenza di François Berlinghi, duttore in antropolugia di u musicale, nant’à “e funzione di u cantu tradiziunale : trà memoria, identità è rituale” venneri u 6 di nuvembre à 6 ore à a bibliuteca municipale di Bastia.

L’associu organisadore, e Giuventù Musicale di Mediterraniu, hè statu creatu in u 1998. Fundatu à l’origine da qualchì amicu passiunatu di musica è bramosu d’inserì a cultura musicale corsa in u Mediterraniu, l’associu s’hè sviluppatu è hè diventatu oghje ghjornu un attore maestru di a vita culturale corsa. Sparghje valori umani di fratellanza, di spartimentu, di scontri, di scambii è d’apertura à l’altru. I so membri organiseghjanu cuncerti di rigalu micca solu in lochi culturali in cità è in e zone rurale. Difatti, e giuvenù musicale di Mediterraniu pruponenu cuncerti di rigalu à tutti in i teatri, sale di spettaculu, spazii culturali, chjese, scene aperte è cuncerti pè i giovani in i stabilimenti sculari di Corsica pè a scuperta di l’altru grazia à a musica. 

Prugramma :  https://www.jmm.corsica/