Inaugurazione di u Centru d'Interpretazione di l'Architettura è di u Patrimoniu Aiacciu Bellu

Truvendusi in l’anziana casa Elisa di a calata L’Herminier, stu CIAP hè un spaziu d’identità di u territoriu è d’attività ecunomica ragiunevule è ragiunata in leia cù u turismu di storia. Hè statu battizatu « Aiacciu Bellu », in umagiu à u puemu liricu di Maistrale cumpostu in u 1932 pè celebrà u piacè di campà in a cità imperiale. Una creazione in u quadru di u so labellu di cità d’arte è di storia. Cum’è un libru, u stabilimentu hè scumpartutu in capituli presentendu u sviluppu di a cità imperiale : u primu : Aiacciu è a so geugrafia, u secondu : i tempi scuri, da a prestoria à a prima impiantazione genuvese. U terzu : 1492, Aiacciu da l’epica genuvese à a cunquista francese. U quartu : Da Napulione Bonaparte à u cardinale Fesch, trà u 1800 et 1850. U quintu : Da Napulione III à a Prima guerra mundiale, a perioda maestra d’Aiacciu. U sestu: Da a fine di a Prima Guerra à u XXIu seculu, un seculu di mutazione.

Ghjè una porta d’entrata nant’à u territoriu aiaccinu urganisata in trè spazii : una buttega d'accolta, una sala di panurama induve si trova un mudellu di a cità in 3D arrembatu nant’à un screnu di prughjezzione. Un racontu storicu di 15 minuti in corsu, francese è inglese hè dispunibule. Avemu dinù una sala di cronache permettendu d’apprufundì sugetti in leia cù a storia è e tradizione aiaccine grazia à equipamenti multimedia. Custì, ritruvemu Napulione o a Madunnuccia.

A storia d’Aiacciu hè fatta d’evenimenti più o menu impurtanti. Dopu à i tempi turbati di u Medievu, a cità rinvivisce in u 1492 sott’à a duminazione genuvese è diventa à pocu à pocu una cità cumerciale ingiru à una citadella. A principiu di u XIXu seculu, Aiacciu entre ind’a mudernità sott’à l’influenza di Napulione. In u XXu, hè a prima cità francese liberata durante a Seconda Guerra mundiale.

Apertu di rigalu à u publicu da u primu di nuvembre à u 30 d'aprile : 9 ore – meziornu / un'ora – cinqu'ore. Da u primu di maghju à u 31 d'ottobre : 9 ore è quartu – 6 ore.