Nutiziale culturale

Mostra “Pasquale Paoli vistu da Dorothy Carrington” à a bibliuteca Fesch d’Aiacciu sin'à u 16 di ghjennaghju 2026

A bibbiuteca patrimuniali Fesch d’Aiacciu vi pruponi di scopra l’archivi parsunali di Dorothy Carrington annant’à Pasquale Paoli sin’à u 16 ghjinnaghju di u 2026.

Pè a cumemurazione di i trè centu anni di nascita di u Babbu di a Patria, a mostra presenterà sta persunalità storica vista da Dorothy Carrington, scrittrice è dunatrice di a Bibliuteca Fesch. U publicu puderà scopre una selezzione d’archivii persunali di Lady Rose, cumpletata da documenti inediti esciuti da e cullezzione corse di i XVIIIu  è XIXu seculi di sta bibliuteca. L’entrata hè di rigalu. Si pò vedela da u luni à u venneri da un’ora è mezu à cinqu’ore è mezu.

D’altrò, durante sti trè mesi, seranu messi in risaltu Lady Rose è a so lascita intellettuale in archeolugia, etnolugia, storia, mitu è litteratura. Omu puderebbe stunassi di stu mischju di documenti è d’ogetti intimi accant’à archivii manuscritti è fotograffichi. Ma rimanda à una Lady Rose scrivacciulendu è disegnendu e so “scuperte” in i so carnetti, raccugliendu ritratti, ritaglii di giurnali è carte di felicitazione. A donna di lettere s’affacca daretu à a so bibliuteca persunale chì hà accumpagnatu a so zitellina, a so vita di scrittrice è a cercadora in i so sugetti prediletti, frà elli Pasquale Paoli, un sugettu d’interessu tempu ch’ella principiava a so attività di ricerca scientifica. A lascita di Dorothy Carrington serà presentata da Francis Beretti, agregatu d’inglese, prufessore emeritu à l’Università di Corsica, Pascale Sageaud, prufessora agregata d’inglese à a facultà di dirittu è di scienze ecunomiche di Limoges, Hélène Paolini-Saez, direttrice di u Laburatoriu Regiunale d’Archeolugia, Joseph Cesari, cunservadore d’archeolugia à a DRAC, Direzzione Regiunale di l’Affari Culturali. Infine, cunferenze seranu pruposte pè illustrà sta mostra 

Mostra “Pasquale Paoli vistu da Dorothy Carrington” à a bibliuteca Fesch d’Aiacciu, 50 carrughju cardinale Fesch sin’à u 16 di ghjennaghju.