Nutiziale culturale

Terra di Conti, u festivale assuciativu da u 29 di nuvembre à u 7 di dicembre in Calvi, Costa, L'Isula, Lumiu

Ciuttate in l’universu di e fole, legende è mitolugie corse è d’altrò pè stonde di spartimentu è trasmissione durante opere teatrale, cuncerti, cunferenze è spettaculi per tutti ! 

Sabbatu u 29 di nuvembre à 8 ore, l’opera teatrale L’Alchimiste di Paolo Coelho à a sala di spettaculu di Calvi. St’adattazione teatale ci porta in l’aventura affascinante di Santiago, un giovanu pastore d’Andalusia chì cerca un tesoru piattatu ch’ellu hà vistu in sonniu. Una cerca trà puesia, spiritualità è aventura.

Venneri u 5 di dicembre à 6 ore, A Veghja di fole è legende - Piazza di u paese di Costa (Riservazione obligatoria nant’à u situ : terradiconti.com). Sta veghja si ferà ingiru à u fucone tradiziunale cù i capifulaghji Don Mathieu Santini è Ghjacumina Acquaviva. Musica è participazione di u publicu chì puderanu cuntà e soie e fole feranu rinvivì a magia di e veghje corse trà spartimentu, emuzione è creatività. A serata serà purtata in musica da musicanti balanini è da u publicu. Tutt’ognunu hè invitatu cù u so strumentu pè impruvisà, accumpagnà o prupone i so ritimi persunali pè un scontru vivu è interattivu induve u focu, e parolle è i soni si mischjanu è cusì facenu rinvivì l’anima di e veghje corse.

Sabbatu u 6 di dicembre

A 5 ore, cunferenza di Ghjasippina Giannesini nant’à i Mazzeri à a merria di L’Isula. St’esseri misteriosi capaci à vede in i so sogni e persone chì anu da more. Un mondu carcu di secreti induve legende è tradizione si mischjanu.

A 8 ore, cuncertu di Balagna à cant’à Paoli in chjesa di a Misericordia sempre in L'Isula. Ritruvate a storia, u destinu di Pasquale Paoli durante un spettaculu di prima trinca presentatu durante canti purtati da una narrazione sensibule è incarnata. Ispiratu da l’emissione “Storia” di RCFM presentata da Marc’Andria Castellani è cunsacrata à u Babbu di a patria, stu prugettu addunisce opere di tandu è creazione cuntempuranee fendu una leia trà memoria è presente. In u filu di u racontu, s’affaccanu persunagi ingiru à Paoli : u so babbu Ghjacintu, u so fratellu Clemente ma dinù numerose persone curagiose chì si sò battute à fiancu à elli, patriotti spessu sguassati da u tempu è u scordu.

Dumenica u 7

A 5 ore, A Strada di i Venti, fola musicale per tutti à a vigna Culombu di Lumiu. Ghjè un viaghju pueticu, bislingu è fora di u tempu, chì rivisiteghja cù tennerezza u racontu “Ninu è a mamma di i venti” cuntatu da l’autora Francette Orsoni à u ritimu di e cumpusizione di Philippe Biondi, sustenuta da a chitarra delicata di Sandrine Luigi è u viuluncellu prufondu d'Anne Gambini. Inseme,  facenu suffià un ventu novu nant’à a tradizione orale corsa, trà memoria è mudernità pè prupone a sperienza d’una stonda di spartimentu viva, calurosa è universale.