Nutiziale culturale

U quintu Festiv’Aleria Antica da u 18 di lugliu à u 2 d’aostu nant’à u situ archeologicu

Sta nova edizione hè cunsacrata à i miti di l’isula di Creta. Teatru, ballu, musica è scontri archeologichi pè fà di Aleria un appuntamentu maestru di u teatru anticu cuntempuraneu in Mediterraniu. L’evenimentu, purtatu da a Cullettività di Corsica è da a cumpagnia TeatrEuropa, vole fà dialugà a memoria storica, litteraria è mitulogica cù a creazione cuntempuranea. À u prugramma, spettaculi di creazione nant’à a mudernità di i miti antichi, scontri d’archeolugia nant’à u mondu etruscu, cuncerti, spettaculi di ballu, master classes di teatru è di musica.

Cusì, l’organisadori anu vulsutu fà campà u patrimoniu altrimente è micca limitassi à una sola visita di u situ archeologicu. Festiv’Aleria Antica s’interessa in u 2026 à u grande ciclu mitulogicu di a Creta. U Minautoru, u Labirintu, Ariana o ancu Tesea seranu in core di i spettaculi pruposti durante sti quindeci ghjorni. Principia dunque sabbatu u 18 di lugliu à 9 ore è mezu di sera cù “Sénéqu’un bide !” un spettaculu comicu scrittu da Orlando Forioso in cullaburazione cù Anne-Laure Cristofari. Rivene nant’à l’esiliu in Corsica di stu famosu filosofu, omu di Statu, autore dramaticu rumanu chì ci averebbe campatu trà 41 è 49 dopu à Cristu. Una stonda storica pocu documentata, chì hà datu l’ispirazione à u rialisadore Orlando Forioso. « A squadra vulia travaglià nant’à sta perioda fendu una leia cù u teatru postu chì Sénèque scrivia tragedie. Ma quì si tratta d’una cumedia chì si passa in Luri, cù persunagi chì volenu rialisà un’opera teatrale ma ùn a ci facenu”.

L’ambienza hè pupulare in un quartiere pupulare di l’epuca rumana cù st’omu Sénéque chì sbarca cum’è un ovni. Ghjucata da una truppa di cumedienti prufessiunali, Thomas Bronzini, Bastianu Brighi, Anne-Laure Cristofari, Marie-Paule Franceschetti, Pierre Pasqualini, Laetitia Damiani è Michele Onori, l’opera « permetterà di scopre l’Antichità cù umurismu è mettendu à tempu in risaltu una stonda pocu cunnisciuta di a storia di a Corsica”.  Prugramma  di u festivale : https://www.isula.corsica/patrimoine/agenda/Festiv-Aleria-Antica--Edition-2026_ae2058829.html