Nutiziale culturale

14 è 15 di lugliu di u 1755: Pasquale Paoli fù elettu Generale di a Nazione Corsa

(A redazzioni d'Alta Frequenza) - 268 anni fà, u 14 è u 15 di lugliu di u 1755, Pasquale Paoli fù sceltu generali di a nazioni corsa, à u cunventu Sant'Antone di Casabianca. Dopu à un esiliu di più di 15 anni, par asempiu ind'u regimentu napulitanu 'Corsica', è mentri ch'ellu t'avia 30 anni, Pasquale Paoli duvia ritruvà a so isula, è participà à l'alizzioni di Casabianca. 16 pievi, nant'à 40, ani participatu à ssa cunsulta chì duvia cambià a Storia di a Corsica. 'Emi pinsatu chì u mezu u più accittevuli è u più efficaci (...) era l'alizzioni di un capimachja, un Generali chì s'occuparia di l'ecunumia è di a pulitica di u reami, cù mezi senza limiti fora di ciò chì cuncerna l'affari di u Statu chì dumandani l'accunsentu di i pupulazioni o di i so diputati. U nostru votu, à l'unanimità, s'hè fattu nant'à l'Eccellentissimu Pasquale Paoli, omu chì hè statu ghjudicatu u più degnu da tanti virtù è qualità'. U ghjornu stessu, s'hè dicisu d'ubligà i truppi stragneri à abbandunà, di scriva legi è soprattuttu di cundannà à morti i Corsi chì pudariani aiutà u nimicu, di mandà fora di l'isula i traditori è di cundannà li. Paoli hà da aduttà dunqua - subbitu - una pusizioni più radicali cà quilla di u so babbu vinti anni prima. Forsa ch'ellu hè vulsutu : ci hè una vera voglia di severità. Paoli è i so difensori dicidini dunqua di dichjarà 'una guerra eterna à a republica di Ghjenuva è à qualsiasi putenza chì a pruteghjaria'.