Nutiziale culturale

A traduzzione in corsu è francese di i dibatitti à l’assemblea di Corsica

Dapoi u 30 di marzu, una traduzzione di a sessione da u corsu à u francese è da u francese à u corsu hè pruposta à l’eletti è à u publicu. Sei traduttori stallati sopr’à l’emiciclu ne sò incaricati. Una sperimentazione pè risponde à a decisione di u tribunale amministrativu, u 9 di marzu scorsu, di censurà l’articuli primi di l’Assemblea di Corsica è di l’Esecutivu precisendu chì e lingue di i dibattiti sò u corsu è u francese. U prugettu esistia quantunque digià nanzu sta censura cum’è pista di travagliu in u raportu d’orientazione nant’à a lingua corsa, presentatu di nuvembre 2022. Sta sperimentazione hè dinù un mezu di sicurizà e deliberazione di l’Assemblea di Corsica cù a traduzzione di i dibattiti in francese permettendu chì tutt’ognunu possi capì i dibattiti è preservà da a censura e deliberazione presentate in lingua corsa.

A traduzzione di i dibattiti si face dapoi quasi un annu à u cunsigliu regiunale di Brittagna. Un esempiu preziosu pè l’Assemblea di Corsica chì hà mubilizatu sei traduttori chì si sò sustituiti durante sti ghjorni di sessione pè un’operazione chì hà custatu 6480 euri. D’altrò, i mezi tennichi ùn anu abbisugnatu altre spese ma puderebbenu esse migliurati. Dunque investimenti novi sò pussibuli in u quadru d’un prugettu glubale di rinnuvazione di l’emiciclu. Dopu à sti dui ghjorni di sperimentazione, si ferà un bilanciu a settimana prossima nant’à tutti i mezi tennichi è umani mubilizati pè capì e difficultà chì sò accadute è pè migliurà u sistemu.