Nutiziale culturale

Claude Papi, l'icône

U 28 di ghjennaghju 1983 si n’andava à l’altru mondu u più famosu ghjucadore di a storia di u pallò corsu Claude Papi. 40 anni dopu à so sparizione Jean Paul Cappuri, Jean Richard Graziani è Jean Marc Raffaelli anu vulsutu unurallu cù l’esciuta di u libru “Claude Papi l’icône” à l’edizione Coletta. Un’opera di 200 pagine cunsacrate à un destinu unicu è chì ùn si limita à l'ambiente spurtivu. Solu elli pudianu scrive stu libru, per via chì sò di una generazione di giurnalisti chì anu cunnisciutu, seguitatu è eranu in cuntattu cù u persunagiu, soprattuttu à un’epuca induve i ghjucadori di pallò avianu a vita di tutt’ognunu. Sti trè omi anu strintu leie amichevule è cunfraterne pè travaglià à un’opera tamanta : Claude Papi, l’icône. Un librone magnificatu da l’impaginatura di Xavier Grimaldi è puntellatu da ritratti, frà quessi ritratti novi, parechje entrate di lettura pè un racontu scumpartutu in tematiche è tante testimunianze. L’idea di scrive stu libru hè nata durante una discursata nant’à a piazza San Niculaiu. I giurnalisti parlavanu di Papi è si sò accorsi chì s’avvicinava u 40u anniversariu di a so morte. Da quì hè nata l’idea di fà un libru. Un libru chì Jean-Paul Cappuri hà prupostu di cunsacrà à a vita d’un omu avendu una vita troppu corta cum’è James Dean ma st’esistenza interrotta di colpu hà cunfurtatu a legenda. I giurnalisti anu studiatu l’archivii, cuntattatu assai ghjente, a famiglia di Claude chì hà cuntatu tante cose è messu à dispusizione assai documenti cù una cunfidenza tutale. Un annu di travagliu hè statu necessariu.

In più di e fiure di legenda, u lettore ne scuprerà tant’altre, quelle piattate in a storia spurtiva. In sta vita assai più intima chì e so prudezze di ghjocu à pallò, u destinu famigliale hè statu u solcu di sempre, annacquatu da l’amore di i soii è di a so terra purtivechjaccia. Frà i ritratti di stu libru, certi sò cummuventi cum’è e lacrime di Jacques Zimako, partutu ancu ellu à l’altru mondu di dicembre 2021, quand’ellu purtava a cascia di u so amicu in chjesa Notre-Dame-des-Victoires in Lupinu. Avemu dinù numerose testimunianze di ghjucadori d’eri è d’oghje, amichi è persunalità cum’è Michel Platini, Jean-Michel Larqué, Arsène Wenger, Frédéric Antonetti chì hà palisatu ch’ellu hè s’hè ispiratu di u ghjocu di Claude Papi in u so mistieru d’allenadore. L’omu era dinù assai mudestu. D’altronde, u giurnalistu Pierre Cangioni si dumandava s’ellu era cuscente di u so valore. Chì serebbe diventatu Papi s’ellu era sempre vivu oghje ? A risposta meriterebbe un altru libru vistu chì l’omu è u ghjucadore anu lasciatu un scartu tamantu trà u mondu di tandu è a sucetà di cunsumazione induve u ghjocu à pallò s’hè persu. Claude Papi serebbe sicuramente firmatu u listessu senza esse influenzatu da l’ambiente spurtivu. Infine, cum’è ellu dicia l’abbate Alex Stra, u ghjornu di l’esequie : « ùn hè micca partutu, hè andatu à ripusassi in u spugliatoghju ».