Nutiziale culturale

Corsica Sera : 40 anni

U Corsica Sera festighjeghja i so 40 anni u 16 di dicembre. 40 anni fà, u 16 di dicembre di u 1982, à 7 ore è 20, principiava a prima emissione Corsica Sera presentata da Jean-Marc Leccia. U risultatu di tanti anni di cumbatti, in particulare di giurnalisti, pè una diffusione isulana di u 25u telegiurnale di FR3 presentatu in direttu dapoi a Corsica. A u prugramma, una pagina d'attualità di 20 minuti, da 7 ore è 20 à 8 ore menu 20, ogni sera fora di a dumenica cù riporti abbastanza corti è unu o dui cartulari. Si tratta di l’infurmazione di u ghjornu o di a vita generale in Corsica.

A u Corsica Sera si sò aghjustati dui altri appuntamenti d’infurmazione, u Corsica Prima, edizione bislingua, è u Nutiziale in lingua corsa. U 19 di settembre di u 2007, nascia Via Stella, a prulungazione satellitaria di France 3 Corsica, prima televisiò numerica regiunale chì prulungheghja l’ambizione di un’infurmazione di vicinanza. 

Pè festighjà st’anniversariu, Via Stella prevede una prugrammazione speciale, da u 12 à u 16 di dicembre cù dui appuntamenti di prima trinca : mercuri u 14, Emissione Speziale, presentata da Delphine Leoni. À u prugramma: riporti è interviste di Sampiero Sanguinetti, Angelina Risterucci, René Siacci, Yves Gerbault, è tant’altri. Venneri u 16, L’Ochjata speciale pè i 40 anni di u Corsica Sera cù Pierre-Jean Luccioni, Christophe Mac Daniel, Marie-Ange Geronimi, Guy Cimino è Battì Filippi chì ghjucavanu I Storti vicin’à u ben’ di Daniel Pariggi. Un’evucazione di a storia ma dinù di a parudia di l’emissione. Dopu, diffusione di l'integralità di u primu Corsica Sera. D’altrò, l’appuntamenti abituali di Via Stella evucheranu i 40 anni : 40 anni di sportu, d’infurmazione nant’à u Mediterraniu, di cultura, di pulitica, via 40 anni d’infurmazione. Pè l’occasione, l’emissione “In Tantu” d’ogni sera à 7 ore menu vinti hè cunsacrata à l’anniversariu. Infine, i nutiziali Corsica Sera, Corsica Prima è Nutiziale tratteranu in parte di l’evenimentu. Riporti, invitati, è si sprimeranu dinù i telespettatori. I cuntenuti seranu dispunibuli nant’à u situ internet di Via Stella.