Nutiziale culturale

Fiera di u Focu i 7, 8 è 9 d’aostu in Costa

Valurisà l’artigianatu lucale è in particulare ogni mistieru in leia cù u focu (cultellaghji, vitraghji…). Eccu l’ogettivu di l’associu “Costa patrimoniu” chì organiseghja dapoi ondeci anni sta fiera. Quist’annu, più o menu 50 spunenti participeranu, una frequentazione chì hè duppiata dapoi u principiu di a manifestazione. Durante st’evenimentu, parechji ogetti sò fabricati sopr’à locu, frà elli un cultellu corsu chì serà da vince durante una tombula è ci seranu attelli per i giovani. U focu permette dinù di trasmette i gesti, a memoria è a passione di i nostri anziani. 

Dunque, Costa prupone sti trè ghjorni di festa cù una prima ghjurnata chì si stenderà à a notte venneri u 7 d’aostu à parte da 6 ore è u cuncertu di Guillaume Santini à 9 ore. U sabbatu, apertura di a fiera à 10 ore, à 11 ore u merre Barthélémy Colombani, hà da prupone à a visita di a chjesa. Dopu, serà presentatu à 5 ore è mezu u libru per i zitelli” Paola et le secret de l’oeil de Sainte Lucie” cù una lettura di Chloë Paillot. Una manera di mette in risaltu a litteratura corsa di giuventù. Fora di u focu, ci serà una presentazione di a razza di u Cursinu sabbatu à 4 ore è mezu. A sera, cuncertu di Théo Poli è I Zombi à 9 ore. Infine, dumenica, nova presentazione di u libru per i zitelli” Paola et le secret de l’oeil de Sainte Lucie” à 11 ore è serà presentatu dinù u libru ”Energie et prosperité” di Georges Guironnet à 3 ore è mezu, un libru nant’à a trasizione energetica è nant’à l’intrapresari di u settore. A sera, cuncertu di u gruppu E Zinzale à 9 ore.