Nutiziale culturale

I 30 anni di u Centru Culturale Universitariu

In stu mese d’ottobre si festighjeghja i 30 anni di u Centru Culturale di l’Università di Corsica, creatu da Ghjacumu Thiers ! St’ultimu era un artistu di core è pensava à fà carriera in l’arte ma u destinu ne hà fattu un insignante. Stu CCU hè natu per via di a dumanda di u ministru di l’Educazione di sviluppà attività culturale in i stabilimenti. E prime attività si passanu in un lucale davant’à u museu di Corti. Dopu, u CCU s’hè sviluppatu sin’à avè u so casamentu. A creazione di u spaziu culturale Natale Luciani hà datu un soffiu in più à a struttura. Dopu à Ghjacumu Thiers, i presidenti sò stati Nicolas Sorba, Alain Di Meglio è dapoi dui anni Davia Benedetti. A stagione culturale 2023-2024 hè ricca in nuvità cù cunferenze, cuncerti, scontri. Di ghjennaghju 2024, Marie-Claude Pietragalla è Julien Derouault seranu à u spaziu Natale Luciani pè l’opera teatrale “Dans la solitude des champs de coton” di Bernard-Marie Koltès. In quant’à l’attelli di u CCU, anu dinù e so nuvità : teatru bislingu, cucina tradiziunale, a creatività pè luttà contr’à e dipendenze, a Storia cuntata altrimente.

Cum’ella dice a presidente Davia Benedetti, ch’elli sianu ringraziati tutti quelli chì l’anu fattu locu di cultura è d’arte per u benistà è l’emancipazione di a ghjuventù studientina è, aldilà, di a sucetà sana. A cultura nutrisce l’imaginariu è a so brama di custruisce un mondu più ghjustu, liberu è felice. U Centru Culturale di l’Università hè un spaziu creativu da riincantà a nostra leia à a nostr’isula è à l’altrò. Per issi 30 anni, a prugrammazione di u Centru Culturale hè di alta qualità : prisenta varii artisti, attori culturali è scentifichi corsi è internaziunali ; prupone stazii di teatru, di ballu, di cinema, di musica, di lingua corsa, di make up per tutti. U Centru Culturale Universitariu corsu hè u locu da svelà e so mutivazione è da fà sbuccà i so sonnii. Hè di tutti.