Nutiziale culturale

I 50 anni di a rivista Etudes corses et méditerranéennes à l’edizione Albiana-ACSH

L’89u numeru di sta rivista celebreghja un mezu seculu di ricerche pluridisciplinarie, cundutte nant’à un’isula terra di circulazione, di migrazione, di scambii, di rifugii è di cunflitti. I rispunsevuli anu addunitu, pè stu numeru anniversariu, 23 articuli digà publicati pè rispechjà e primure è i duminii cuperti da a rivista, è e grande orientazione edituriale.

Sei duminii sò riprisentati : “A Corsica in u sguardu di l’altru”, “Persunalità di a storia corsa”, “Dinamiche suciale è culturale ind’una Corsica tradiziunale è una Corsica nova”, “Una storia pulitica di a Corsica”, “A Corsica è l’Italia : sguardi cruciati”, “A Corsica, i corsi è u mondu”. Etudes corses et méditerranéennes hè a vitrina di l’associu di i cercadori in e scienze umane (duminiu corsu). I so direttori sò stati successivamente Fernand Ettori, Georges Ravis-Giordani, Francis Pomponi, Michel Casta è dapoi u 2012 Jean-Paul Pelegrinetti.