Nutiziale culturale

Nascita di RCI, Radio Corse International

Una nova radiu corsa assuciativa trasmette nant’à Internet: RCI, Radio Corsica International. Allusione di sicuru à a famosa radiu corsa di l’anni ottanta. Ind’a squadra, unu di i so creatori, Auguste Carta face sapè chì ci sò anziani animatori o tennichi di radiu. Frà quessi certi anu travagliu in l’anziana RCI. A prima emissione in live hà parlatu di a RCI di l’anni ottanta cù e testimunianze di Aimé Pietri, José Stromboni, Jean-Marc Raffaelli, Jean-Paul Cappuri, Michel De Gentili, Pierre-Louis Alessandri, André Casabianca, Virginie Pietri… A nova radiu, diffusata nant’à u net, e rete suciale, l’appiecazione di Smartphone è nant’à a televisiò d’Orange, prupone 80% di u tempu d’antenna cù canzone diverse, senza publicità. Avemu dinù emissione nant’à l’attualità culturale o spurtiva isulana, nutizialetti, infurmazione, meteo, oroscopu, agenda di e festività. D’altrò, i rispunsevuli volenu travaglià cù l’altre radiu assuciative di l’isula. Sò invitati Daniel Vincensini (dumenica u 7 di marzu), i socios di u SECB (u 13), Patrizia Poli (u 14), Petru è Mido (u 20), Orizonte (u 21), è dopu Patrizia Gattaceca, Eric è Jean-François Mattei, Emilie Baldari, l’Associu Mantinum, u cumitatu d’unione Corsica/Armenia… U situ : http://rci.websiteradio.co