Nutiziale culturale

Omagiu à u creatore d’affissi Michel Landi, di San Gavinu di Carbini da u 17 d’aprile à u 26 di ghjugnu

U creatore d’affissi di sinemà Michel Landi si n’hè andatu à l’altru mondu u 17 di dicembre scorsu in Annecy. U so paese di San Gavinu di Carbini è a cinemateca di Corsica celebreranu a so memoria da u 17 d’aprile à u 26 di ghjugnu. Dumane, e so cennere seranu trasferite in core di a cappella famigliale pè un omagiu à u zitellu di u paese, à l’omu è à l’artistu. I so affissi sò vere opere artistiche cunnisciute in u mondu. N’hà creatu più di 1500. Hà ricevutu un César in u 1986 pè quellu di u filmu “Harem” d’Arthur Joffé. U so talente hà illutratu u cinema, u teatru è a litteratura. A so Marylin Monroe hè statu u simbulu di u festivale di Cannes durante dui anni.  

Affissi di cinema ma dinù d’associ (Pinu Tortu, Frombu rennese), i festivali (Festivale mediterraniu di Bastia, Festivale spagnolu d'Aiacciu). Hà disegnatu una fiaccula pustale di Purtivechju 'Di piaghja in muntagna'. In Purtivechju, hà creatu u simbulu di a cinemateca regiunale “Casa di Lume”. St’ultima hà da diffusà i filmi chì Michel Landi hà signatu l’affissi. Jean-Pierre Mattei, presidente di” a Corsica è u Cinema”, fundatore di a Cinemateca di Corsica, hà signatu u documentariu “Profession affichiste signé Landi” copruduttu da Nicolas Mucchielli. Serà diffusatu sabbatu u 18 d’aprile à 6 ore à a cinemateca. A 8 ore è mezu, si puderà vede u filmu “Mon Père” di José Giovanni.

Marti u 12 di maghju, à u prugramma “La fiancée du Pirate” di Nelly Kaplan, chì Michel Landi hà creatu i decori. Marti u 19, “Le désert des Tartares” di Valerio Zurlini, u 26 “Pulsions” di Brian de Palma. U 9 di ghjugnu, “J'ai même rencontré des Tziganes heureux” d'Alexandre Pétrovic. Infine, marti u 26 di ghjugnu, si cumpierà cù un focu d'artifiziu musicale è cinematugraficu cù “Don Giovanni” di Joseph Losey.