Nutiziale culturale

Renaissance de l'orgue corse : 50 anni

L’associu “Renaissance de l’orgue corse” festighjeghja i so 50 anni. Hè natu in u 1970 à a Porta pè priservà l’organi di Corsica. 8 anni nanzu, a famiglia Chailley-Pompei hà invitatu, in u 1962, un giovanu fattore d’organi, Barthélémy Formentelli. Grazia à u so travagliu è à l’appoghju di i paisani, hà risturatu l’organu di u paese è ghjè inauguratu in u 1965. A parte da sta sperienza è grazia à a cumpetenza è à u dinamismu di Dominique Chailley-Pompei, parechji cantieri di risturazione s’aprenu in Corsica. In u 1970, Dominique Chailley-Pompei fonda l’associu “Renaissance de l’orgue corse” cù Félix Quilici è Marien Donsimoni. Grazia à elli, una presa di cuscenza hà permessu di risturà, cù l’aiutu di fattori d’organi è organisti attalentati, i più belli testimoni di u nostru patrimoniu organisticu. Cusì, st’associu hà addunitu tutte e vuluntà, associ, merri è persunalità pè ritruvà l’organi cum’elli eranu prima. Tutti l’anni, cuncerti è furmazione sò urganizati pè ripiazzà l’organu italo-corsu in u so cuntestu liturgicu è culturale. 

Oghje ghjornu, Renaissance cuntinueghja a so missione di cunsigliu, furmazione, animazione, valurizazione è urganizeghja un festivale di musica anziana chì invita famosi insemi pè fà cuncerti ingiru à l’organu. In a so opera, l’associu s’iscrive ind’un ciclu di furmazione cù organisti famosi, persunalità, ispettori chì li permette di tene un sguardu cunsultativu nant’à a qualità di u travagliu di risturazione resu. A so presenza sopr’à locu durante cuncerti, furmazione, è altre ghjurnate di u patrimoniu li dà un statutu di spettatore-animatore predilettu in quant’à l’avvene di stu patrimoniu. Quist’annu, Renaissance de l’orgue corse” festighjeghja i so 50 anni da u 18 di ghjugnu à u 19 di settembre. U so anniversariu permetterà di sente parechji strumenti, d’urganizà cunferenze è altre spusizione pè dà l’organu corsu a piazza à ch’ellu merita.

Participeranu à l’organu Umberto Forni, Sébastien Roué, Frédéric Rivoal, Sdenka Ostadalova è i so quattru insemi. Umberto Forni è u so inseme “in chordis e organo” canteranu arie di Storace, Friscolbaldi, Rossi, Uccellini, Cavallieri... Quellu di Sébastien Roué, arie di Bach, Telemann, Monteverdi, Dumont, Purcell… Frédéric Rivoal cù a soprano Yun Jung Chol anu da interpretà u ripertoriu di Haendel, Mozart è Purcell. Infine, Sdenka Ostadalova è u so inseme Praeludium, opere di Schultz, Rosenmülle, Duron, Bruhns, Vivaldi…  A lista di i cuncerti in chjese corse si trova nant’à u situ isula.corsica/culture. Rinsignamenti: 06 70 86 67 47