Nutiziale culturale

Sedecesima edizione di Bastia, cità digitale da u 12 à u 17 d’ottobre

Fà u so primu giurnale televisivu nant’à u famosu fondu verde, cudificà i so primi alguritmi o scopre a creazione sunora nant’à ordinatore. Eccu qualchì tema di l’evenimentu digitale bastiacciu. D’altrò, centinaie d’elevi corsi scupreranu u funziunamentu piattatu è i periculi di i screni. À parte da u 12 d’ottobre, participeranu à trè percorsi pratichi imaginati da l’associu EMAHO trà u centru culturale Alb’Oru, a casa di e scienze è u museu di Bastia. A u prugramma, a cultura è a creazione numerica, a securità è a prevenzione, a cudifichera è a robotica. Diventendu elli stessi attori di sta creazione numerica, l’elevi capisceranu u funziunamentu di l’alguritmi è li venerà più faciule di scopre i periculi di u web. D’altrò, l’influenza di l’intelligenza artificiale hà una piazza maiò in u prugramma è aldilà in l’attualità. In u quadru di a terza edizione di i Scontri di u spiritu criticu nant’à u tema “agimu contr’à i risichi” organisati da u ministeru di l’Internu è di a trasizione eculogica, Bastia cità digitale hà previsu parechji appuntamenti nant’à u tema “IA ci hè da dubbità ?”. In stu quadru, frà altru, attelli sculari, una cunferenza di a scientifica Anna Choury è una reunione. Venneri u 16 d’ottobre, hè previstu un spettaculu di Clemen Freze pè illustrà cù umurismu cumu i nostri cervelli si lascianu ingannà da a disinfurmazione.

Fora di a prevenzione di i risichi, u festivale brama di fà nasce e vucazione versu i mistieri di u numericu. Mercuri u 14 d’ottobre, serà l’occasione di mette à l’onore e filiere d’avvene. À tempu, l'Usina à prugetti adduniscerà cullegianti pè imaginà suluzione numeriche à prò di u territoriu nant’à u tema di l’hackathon (un evenimentu cullaburativu è intensivu induve squadre s’adduniscenu pè cuncepì è sviluppà un prugettu o un prototippu innuvente imaginendu suluzione numeriche pè u territoriu).

Infine, sabbatu u 17 d’uttobre, a Lupinu Factory trasfurmerà l'Alb'Oru in una grande chermessa numerica induve sò previsti più di vinti panconi di robotica, di rialità virtuale è un attellu di ghjocu video in lingua corsa animatu da Mathieu Mattei. Seguiterà, à 7 ore, a serata di chjuditura Arena social club in i giardini di u museu di Bastia pè celebrà a scena DJ lucale. Entrata : 10 euri. Bastia Digitale, purtatu da l’associu Émaho, hè un evenimentu gratisi sustenutu da a cità di Bastia, a CAB (Cumunità d'agglumerazione di Bastia) è a Cità educativa.