Nutiziale culturale

Tant de folie, 50 scontri famosi di u Sporting rammentati da Jean-Paul Cappuri

Jean-Paul Cappuri hà scrittu u libru “Tant de folie” à l’edizione SAS Coletta.  L’anzianu giurnalistu di u serviziu di i sporti di Corse-Matin rammenta 50 scontri famosi chì anu marcatu a storia di a squadra turchina. Ricordi persunali dinù da Jean-Paul Cappuri, u zitellu di l’anni 60 in e tribune cù u babbu è u ziu à u giurnalistu di u Provençal, Corse-Matin, u cummentadore d’Europe 1. St’opera hè una manera di schjarì u ricordu di stonde chì fermanu in l’incuscente cullettivu bastiacciu. In u filu di e pagine, si ritrova u primu scontru corsu prufessiunale contr’à l’ACA in u 1968, i principii di l’immensu Dragan Dzajic purtendu a maglietta corsa in u 1975, contr’à u Servette di Genève. E vittorie di u SCB, durante l’epupea 1977-1978, contr’à e i squadroni europei, u segnu di Jean-Louis 'kami' Cazes contr’à Lens in u 1981, chì manda u Sporting in finale di Cuppa di Francia. U ricordu di u ritornu di i turchini nant’à u so terrenu in u 1993, ondeci mesi dopu à a catastroffa di Furiani. Omu trema pè Ousman Soumah, in finale di l'intertoto 1997 contr’à Halmstad. Si risente torna a zerga dopu à a cundanna à a rilegazione in Naziunale in u 2010. L’allegria di a vittoria 4-2 contr’à u PSG in u 2015, e baruffe trà sustenidori di Bastia è ghjucadori di Liò in u 2017. Via, avemu i scontri d’accessione, di rilegazione, e vittorie magnifiche è e disfatte umiliente, senza scurdassi di e ferite maiò cum’è quelle di Lubomir Moravcik. 

 
L’autore hà in core u Sporting è ùn s’hè micca cuntentatu di raccoglie articuli è ricordi spapersi. Face rinvivì un’epuca sana. Jean-Paul Cappuri conta i stalvatoghji, i fatti scunnisciuti o sminticati da a ghjente, e stonde strane è preghjudizievule, l’eccessi. Tutt’ognunu hà vistu tante volte u segnu di Claude Papi contr’à u Torino, l’arresti di Bruno Valencony contr’à Nancy in u 1992. Ma quale s’arricorda precisamente di un SECB-Dijon di l’annu 1989 è di a zerga di i sustenidori contr’à l’arbitru chì hà fischjatu un penalty imaginariu ind’una partita induve tutt’ognunu credia di cullà in prima divisione ? Quale s’arricorda perchè Anto Drobnjak fubbe privatu di u titulu di marcadore di Liga 1 in u 1995 ? O di l’accolta di a stampa rumena à i Bastiacci in u 1997 ?

U libru hè ilustratu cù i bellissimi ritratti di i giurnalisti Gérard Koch, Gérard Baldocchi, Pierrot Murati, Xavier Grimaldi, i disegni cù fusaghjine di Raphaël Poletti è quelli umuristichi di Julien Osty. Una bella edizione mentre chì u SCB hà ritrovu u ballò prufessiunale. Da leghje “Tant de folie” à l’edizione SAS Coletta di Jean-Paul Cappuri in vendita in tutte e librarie à u prezzu di 49 euri.