Nutiziale culturale

Un novu diplomu di Statu di prufessore di musica tradiziunale è canti corsi

Pè risponde à una dumanda di u mondu culturale è patrimuniale corsu, sprimata dapoi anni è anni, l’eletti di l'Assemblea di Corsica anu vutatu à l'unanimità a creazione d'una furmazione di trè anni pè appruntà u diplomu di Statu di prufessore di musiche tradiziunale è canti corsi. Dopu sta furmazione, sti futuri insignanti diplumati puderanu assicurà a trasmissione di stu patrimoniu immateriale chì ghjera urgente à salvà.

Sta furmazione serà insignata in Corti à parte da settembre 2024. U costu tutale di u prugettu hè di 852 639 €, frà quessi 711 613 € finanzati da a CDC. Stu prugettu s’hè pussutu fà grazia à a cullaburazione preziosa di l'IESM, l'Istitutu d'insignamentu supranu di a musica d’Ecchisi.

In u percorsu di furmazione teorica è pratica, averemu l’unità d’insignamentu assicurate da l’IESM Europa-Mediterraniu è quelle di l’Università di Corsica esciute pè u più da e licenze lingua è cultura corsa è arti di u spettaculu. In quant’à u percorsu artisticu, hè fundatu nant’à una doppia amparera, cù voce è strumentu. Serà insignata per esempiu a direzzione di coru è a pratica d’un strumentu d’accumpagnamentu permettendu à i studianti d’iscrivesi à prugetti d’educazione artistica è culturale à prò di i sculari. In più, a furmazione  permetterà di sviluppà i sapè scientifichi grazia à l’etnomusicolugia, l’antropolugia, a storia di a musica… è insignamenti cunsacrati à a ricerca. A tempu, u sviluppu di i dipartimenti di musiche tradiziunale in i cunservatorii d’Aiacciu è di Bastia deverebbe fassi cù a creazione d’impieghi permanenti è d’intervenenti in stabilimenti sculari.

A a fine di a furmazione, prugetti sò pussibuli pè stendesi à a musica tradiziunale ind’u Mediterraniu : forse accoglie studianti sardi o siciliani, è à tempu espurtà l’insignamentu di e musiche è canti corsi fendu cusì prugetti trasfruntalieri: per esempiu, un studiante passiunatu di viulinu puderebbe presentà in Corti un percorsu di furmazione chì li permetterà d’esse diplumatu di musica tradiziunale corsa, ma dinù in a so specialità musicale.