Nutiziale culturale

128a Fiera di a Canonica in Lucciana i 23, 24 è 25 di maghju

St’evenimentu, chì esiste dapoi più d’un seculu, si scumparte trà pelegrinaghju anticu celebrendu Santa Divota, patrona è prutettrice di Lucciana, mercatu artigianale è altre festività. Organisata da a municipalità, a fiera aprerà ogni ghjornu à 10 ore. L’appuntamentu religiosu maestru serà u pelegrinaghju di a Canonica, Santa Divota, San Parteu è Santa Maria Assunta luni di Penticoste u 25 di maghju à parte da 10 ore è mezu. Ci hè quì dinù una leia storica per via ch’ellu ramenta l’unione trà Lucciana è Monaco. A legenda di Santa Divota, marturiata in u 283 dopu à Cristu è chì a barca ghjunse sin’à Monaco, serà u sugettu d’una cunferenza di prima trinca animata da Jacques Pastor è Stéphane Orsini, dumenica u 24 à 4 ore à u Museu di Mariana.

 A fiera hà da accoglie più di 100 spunenti di Corsica pè mette in risaltu a qualità di l’artigianatu corsu. In fiera, omu pò spassighjà frà i panconi di prudutti tradiziunali è muderni, l’arte è a decurazione, ogetti di moda è di benestà (vale à dì ghjuvelli, cusmetichi è cusgitura artigianale). D’altrò, sò previste animazione di fiera, demustrazione spurtive, d’artigianatu, spassighjate nant’à poney, attelli di primu succorsu è cuncerti cù entrata di rigalu : 

• Sabbatu u 23 di maghju à 9 ore : u gruppu Spartifloyd sunendu rock prugressivu, blues è jazz.
• Dumenica u 24 : u gruppu Moca à 9 ore è dopu u set électro-disco di DJ Lovster à 11 ore è mezu.
• Luni u 25 : serata ballarina à 6 ore è cuncertu di Daniel Vincensini à 8 ore.