Nutiziale culturale

I vint’anni di a fiera di a caccia è di a pesca in Ponte Novu i 27 è 28 di ghjugnu

Pè celebrà st’evenimentu, l’organisadori anu previstu un prugramma di demustrazione, animazione, mostre, gastronumia è serate musicale, in particulare u cuncertu di I Voci di a Gravona stu sabbatu. A Fiera di a Caccia è di a Pesca mette in risaltu i sapè fà in leia cù ste duie attività, ma dinù a natura è u patrimoniu rurale. Un locu di scontru cù passiunati, prufessiunali, artigiani, famiglie è curiosi.

A parte da 10 ore di mane, si puderà scopre panconi di materiale di caccia è di pesca, artigianatu, prudutti lucali, assiste à demustrazione di pesca, d’ammaestramentu d’animali è participà à animazione pensate pè tutti. Sta fiera hè altru chè una fiera. Hè un evenimentu identitariu, un locu di trasmissione, una stonda di festa è di spartimentu micca solu pè i passiunati di caccia è di pesca. L’entrata hè di rigalu.