Nutiziale culturale

U festivale Corsica Party da u 25 à u 27 di ghjugnu in Bastia

Sta nova edizione rimette à l’onore a musica, a lingua corsa è u sportu in leia cù a valurisazione di tutti l’aspetti di l’isula. Cusì, sò organisati parechji appuntamenti in sfarenti lochi di a cità. Principia à u sinemà Le Régent pè a prughjezzione di u filmu U Nome di a Rosa, l’adattazione in lingua corsa da l’associu Fiura Mossa di u filmu di Jean-Jacques Annaud “Le nom de la rose”.

U lindumane, in cullaburazione cù Chérie FM Corsica, seguiterà u cuncertu Voce di a Corsica nant’à a piazza San Niculaiu cù Louis Franceschi, puntellu di L’Arcusgi, cumpare di l’edizione 2026 di u festivale. Da sapè chì canteranu in particulare studianti di l’università di Corsica, iscritti à l’attelli musicali di u CCU Kevin Versini, Mae-Lys Kensey, Dylan Lunardi, Maria Stella Remiti, Marie Muzzin, Marie-Rose Rinieri, Laura Brachi. Sò stati selezziunati pè cantà cù famosi artisti corsi Diana Saliceti, Ghjiseppu Pastinelli è tant’altri, è ancu cù artisti inaspettati. Durante sta serata, serà rimessu u Premiu Corsica Party - Petru-Guelfucci. Stu premiu distingue ogni annu una persunalità, artisti, un gruppu o un prugettu isulanu chì simbuliseghja i valori di u festivale è cuntribuisce à fà risplende a Corsica. D’altrò, seranu rimessi i trufei à i campioni di Regiunale 1 U13, U14 et U16, i vincidori di a Cuppa di Corsica U16, U18, Signori è di u Challenge Alex Stra, i campioni U18 è Regiunale 1 ESCCOM Signori è à quellu chì hà riesciutu u più bellu segnu in Signore di a stagione, in cullaburazione cù a Liga Corsa di pallò. 

Infine, l’ultima serata cù u festivale NRJ sempre nant’à piazza San Niculaiu sabbatu u 27 di ghjugnu cù parechje vidette internaziunale ma dinù u DJ Titi Salducci, l’artisti Flo Carli è Thomas Bronzini. Durante stu sabbatu, a piazza hà da accoglie e finale di A Cuppa di a CAB, u turneu trà quartieri di a Cumunità d’Aglumerazione di Bastia cù rimessa di i trufei.