Nutiziale culturale

Mostra 'Femin'Isula' à u Museu di a Corsica, in Corti sin’à u 30 di dicembre

A mostra Femin’Isula hè una storia di a piazza di e donne ind’a sucetà corsa da a prestoria à a nostra epuca. L’evenimentu presenta i dispusitivi chì anu permessu à certe d’influenzà i so destini sin’à l’emancipazione è u cumbattu feministu. L’occasione d’infurmà in modu novu nant’à e tappe di a storia di e donne corse in i duminii publicu è privatu. A mostra mette in risaltu l’ultime ricerche storiche nant’à u rolu puliticu di e donne nanzu è durante l’epuca cuntempuranea, in particulare i cumbatti feministi pè ottene diritti.

U percorsu hè argumentatu è illustratu da ritratti di donne, cunnisciute o menu cunnisciute chì anu participatu, in modu cuscente o nò, à l’evuluzione di a piazza di e donne in a sucetà isulana. A diversità di l’ogetti presentati (ritratti, pitture, caricature, sculture, vestiti, canti, giurnali, affissi, foglii di prupaganda, robba audiovisiva...) sò elementi pè illustrà itinerari di vita impegnata o nò.