Nutiziale culturale

Da caminu, u secondu dischettu di Tempus Fugit

Una traversata interiore purtate da e voce di u gruppu Tempus Fugit. Una leia delicata trà tradizione è mudernità, trà memoria viva è creazione. U primu dischettu di u gruppu bastiacciu era un'opera di canti liturgichi. U secondu hè rinnuvellamentu ma sempre arradicatu ind'una memoria immemuriale, ciuttendu à e radiche di u cantu tradiziunale. Un pelegrinaghju pulifonicu illuminatu da voce magnifiche è ispirante. « Da caminu » entre ind'un percorsu d'esistenza chì, cum'è u cantu « Ora VII » và da a giuventù à a vechjaia, « Ora » s’interrugheghja nant'à u tempu chì passa. A l’origine, ci eranu tredeci canti. N'anu selezziunatu trè chì li parianu emblematichi : frà elli « Ora IX » dedicatu à un amicu partutu à l'altru mondu è « Ora III » chì evucheghja chjassi di vita chì si scontranu pè diventà cumuni cù e persone scuntrate.

L'opera cuntene dinù dui canti religiosi « Introït » è « Kyrie eleison ». Dui canti di messa sacri ma micca solu religiosi. Frà i tituli di u novu dischettu, e variazione nant'à u tema di « vindicatio » ritenenu l’attenzione postu chì chjamanu à ricusà a viulenza arcaica à prò di una ghjustizia appaciata luntana da a vindetta. D'altrò, quandu si stà à sente u dischettu, si sente l'ore chì passanu. U tempu appuntu rimanda à « Tempus fugit », u tempu chì rode tuttu, e cose è e persone, ma pò permette dinù à ghjente d'esse felice s'elli ricusanu di dissuchjassi. A a fine di i canti, ci hè sempre una speranza realista. Stu tempu chì passa hè cunsideratu in modu serenu senza paura, senza angoscia, adattendusi. I canterini cercanu risorse in elli pè fallu diventà una forza.