Nutiziale culturale

Nulu 33, u novu dischettu di I Muvrini esce u 30 di maghju

I Muvrini voltanu cù stu novu dischettu d’ondeci canzone tracciate à u pinellu cù a sensibilità particulare di u gruppu. St’ultimu festighjeghja ciò chì campa, ciò chì dà, ciò chì appassiuneghja, ciò chì sunnieghja, ciò chì alza… Pè disegnà “ciò chì hè più grande chè noi”, anu custruitu sta scala di canzona, da un scalinu à l’altru, cum’è una scala di u core. Anu postu stu nulu 33, una sinfunia senza cunfine “pè chi nunda ci separi !”

I Muvrini portanu in core sta parentia cù tutte e sponde di u Mediterraniu : u Blues corsu ci scontra una chitarra portughese, i cori africani di César Anot raghjunghjenu u « Fado » di i Corsi, u groove urbanu sposa u cantu di e Terre, a meravigliosa soprano di Kelly Poukens i raghjunghje, è u core di zitelli sublimeghja i ripiglii. In u 2025, da u so Nulu 33, s’appichjanu nant’à e cime.