Nutiziale culturale

Viaghju in core di u Medievu corsu cù u gruppu Mimoria Tramandata

U gruppu pumuntincu Mimoria tramandata, originariu di Gravona è arradicatu dopu in u Prunelli, hà esciutu u novu doppiu dischettu “Medievu”. Un prugettu tamantu avendu necessitatu dodeci anni di travagliu chì ciotta u publicu in a storia medievale di a Corsica. A tempu u risultatu di 25 anni di militantismu culturale. Fundatu in u 2000, l’inseme artisticu Mimoria Tramandata era capunanzu una scola di cantu è hè diventatu dopu un gruppu culturale cù sempre a so vucazione pedagogica chì trasmette a memoria da una generazione à l’altra. Ci sò sei membri : Laurence Cardi-Tramini, Stefanu Cardi, José Borghesi, Anthony Secondi, Mathias Deiana è Antoine Tramini. St’ultimu essendu membru fundadore, canterinu dapoi 42 anni è persunalità culturale isulana. Hè dinù artigianu cultellaghju ricunnisciutu è intervenante in lingua corsa in e scole. 

Mimoria Tramandata hà scrittu una canzona pè ogni persunalità di u Medievu corsu : da Sambucucciu d’Alandu à Vincentellu d’Istria, da I Ghjuvannali à Ghjudice di Cinarca. I strumenti anziani (cetera, bouzouki grecu, percussione mediterranie) si mischjanu à un’ispirazione cuntempuranea chì facenu sente una sunurità muderna à stu racontu storicu. Tante canzone di stu novu dischettu palesanu stonde medievale corse : A Sambucucciu, A vittoria di Colonna, Ghjudice di Cinarca, Passu Morescu, A quiddu di Ghjuvanni, Cacciamossa…Medievu in fatti ùn hè micca solu un dischettu, ma un veru prugettu patrimuniale. Ogni canzona hè un punticellu trà passatu è presente pè fà cunnosce una perioda spessu pocu cunnisciuta da u publicu.