Nutiziale culturale

“Anima terrania”, u scontru musicale di Letizia Giuntini cù i viuluncelli di Moita

« Anima terrania », ghjè a surpresa di stà sente una voce, quella di Letizia Giuntini è a musica di i viuluncelli di i scontri di Moita diretti da Célia Picciochi. Un’addunita musicale è vucale inaspettata ma assurtita magnificamente. E qualità vucale è strumentale di u dischettu si sparghjenu à quandu cù gravità, à quandu cù legerezza. Parolle è note si rispondenu, s’incrocianu o si fondenu trà di elle. A sunurità calda di e parolle in corsu dialugheghja cun quella di e frase in francese. E 13 canzone tessenu una leia sensibule trà dui mondi musicali, unu in leia cù a ruralità è l’altru in leia cù a grande tradizione di a musica sapiente. Un viaghju musicale sinceru, arradicatu è universale. E corde di i viuluncelli è a voce di Letizia contanu a listessa storia : quella d’un gruppu d’umani di lochi sfarenti chì s’adduniscenu pè fà nasce a bellezza. Anima Terrania festighjeghja e forze vive, a memoria di i territorii, è a bellezza semplice di l’emuzione umane. I canti di Letizia s’arradicheghjanu in a terra, u ventu, a petra. U viuluncellu quì ùn rimanda micca à a nustalgia o à a musica sapiente.

L’opera face risente un’aria marina, muschi d’olivi, di vigne, di machja, d’erbe è di frasconi, paisagi muntagnoli, fiumicelli…  Hè a creazione di dui associ, Musi’Cal è quellu di a pieve di a Serra pè i viuluncelli cù Célia Picciocchi. Canzone è musiche sò state arrigistrate in a chjesa di Matra.

Prima, ci hè a voce forte, roza è sensibule ammanita da a tradizione corsa di a balanina Letizia Giuntini. Essendu pastora, campa in cuntattu cù l’animali, ind’a natura trà mare è muntagna. Custì, hà amparatu à stà à sente e bestie, u ventu, e voce di u mondu. Autrice, cumpunitrice, interpreta, Letizia hà campatu dapoi a so zitellina in u cantu tradiziunale corsu. Canta sola o in gruppu, cumpone in corsu è in francese storie, lode à a natura è à a vita.

In quant’à Célia Picciocchi, hè dinù un persunagiu maestru di u paisaghju culturale isulanu. Viulunista di prima trinca, cumpunitrice, assestatrice, sona micca solu cù i viuluncelli di Moita ma dinù in l’orchestri Trio Elixir, Jakez Orkestra, u gruppu Voce Ventu, è accumpagna nant’à a scena canterini cum’è Michè Dominici, Lionel Giacomini…