Nutiziale culturale

Felì 2026, 60 anni... digià à L'Alb'oru di Bastia i 13 è 14 di ferraghju à 8 ore è mezu

Un viaghju musicale intimistu, arradicatu in Corsica, trà ricordi, nuvità è emuzione. Sti dui cuncerti acustichi sò i primi di u giru pè i sessant'anni di Felì. Cù e so canzone, l’artistu casinchese hà sappiutu custruì un'opera prufonda è impegnata, mischjendu puesia è meludie intempurale. Nant'à a scena, prupunerà un ripertoriu cù e so più famose canzone è nove creazione, sempre guidatu da u so amore di a lingua corsa. Dapoi trè decennii, Felì face dinù à prò di a trasmissione di u cantu è di a cultura corsa vicin'à e giovane generazione, per esempiu Scola in Festa. Ch'elli sianu cù i so dischetti, spettaculi o cullaburazione cù gruppi cum'è Canta U Populu Corsu o Isulatine, hà sempre fattu a leia trà lascita tradiziunale è creazione cuntempuranea.

Dice u canterinu : principieremu u 13 di ferraghju à l’Alboru in Bastia. A prima sera hè digià colma. Dunque femu un antru cuncertu u 14. Ognunu sà chì ghjè à San Valentinu, ci serà a sera un attenzione particulare per tutte e donne chì saranu inde a sala. Avemu da fà un picculu regalucciu è cusì ci arricurderemu tutti inseme di ssa data. U cuncertu hà da esse piuttostu accusticu, saremu sei nant’à a scena. Ci serà Toni Falone chì sunerà d’urganettu. Toni ch’hè un amicu di tandu ch’hà fattu l’accunciature di u famosu discu E nove, è ch’hà accunciatu à Golu, Mediterraniu, eccetera. Pierre Agostinetti à u pianò. Laura Degiovanni chì vene d’avè un ciuccettu, dunque chì ghjè mamma, vene cù noi à fà ssu giru. Alanu Gherardi à a voce dinù è à a ghitara bassa. È e percussioni di Micka Olivier. Tuttu què in un decoru piuttostu casanu, dicieraghju, senza dì ne di più.
Dopu avemu da fà uni pochi di cuncerti, in Corsica è in Cuntinente, di veranu è tutta l’estate, è si finiscerà st’annata in fine 2026 in una cità aurupeana.

Riservazione : https://bastia.notre-billetterie.com/