Nutiziale culturale

'Di capu è di core', u primu dischettu di Bernard Ferrari

Musicante assai rinumatu è ricunnisciutu in l’universu di u cantu corsu, Bernard Ferrari hà esciutu l’annu scorsu, un primu dischettu, fruttu d’un travagliu intimu : « Di capu è di core ». Un’opera di 16 tituli chì spechjanu u so sguardu nantu à a sucetà d’oghje…

Dapoi guasgi quaranta anni, Bernard Ferrari hà fattu a so strada inde l’universu di u cantu corsu. « Canta u populu corsu », « L’altru latu », « Voce ventu », « Contraversu… » I gruppi ùn mancanu micca per un omu chì passò dece anni à u cunservatoriu di Bastia, capace, oghje d’una certa creatività arrimbata nantu à modi classichi o muderni. Hè cunnisciutu dinò per u so impegnu à prò di a lingua corsa- fù sin’à pochi tempi fà, u direttore di u serviziu di a lingua corsa- Issu percorsu hè sbuccatu, menu d’un annu fà, nantu à un dischettu cuncepitu da ellu stessu cù a participazione di qualchì amicu canterinu è musicante : Ceccè Lanfranchi è Patriziu Croce (scrittu), Celia Picciocchi (viulinu), Bruno Vidal (batteria), Laurent Labbé (trumbetta), Michè Solinas (pivana è viulinu). Un inseme chjamatu « di capu è di core ». « Hè qualcosa ch’eu vuliu dì à traversu ste canzone, spiega l’artistu, u cantu hè un’apertura ver di u mondu è dinò una tulerenza. Sò creazione è meludie tenute in mente durante anni è anni…Per a scrittura, Ceccè è Patriziu portanu, ognunu, u so stilu è dinò duie parlate diferente. Per a musica, aghju spartutu scene cù tutti quelli chì m’accumpagnanu. Cù Celia, avemu u listessu filu. Ghjè st’inseme chì permette di mantene a fiara ch’eu vuliu… »

« Di capu è di core « risonna cum’è un innu à i tempi di u riacquistu è ciò chè l’artistu chjama « una revuluzione culturale permanente. »
L’opera si cumpone di 12 canzone è 4 pezzi strumentali. Cù un stilu arrimbatu nantu à quellu di u riacquistu ma dinò « post canta » cù versi più muderni. « A manera d’ascultà a musica è di cuncepiscela hè diferente oghje, aghjusta u cantadore, cù e rete suciale, u rapportu ùn hè più u listessu. Ci tocca à tene contu di sti fatti quì in a creazione. »

À l’iniziu, Bernard Ferrari ùn hè guasgi è micca cunnisciutu in tantu chè cantadore. « Sò statu ciuttatu ind’un bagnu musicale cù babbu chì sunava di mandulina è un ziu di ghitarra. Ma hè vera ch’ùn aghju mai cantatu in tutti i gruppi à i quali aghju participatu. À dilla franca, ùn mi sò mai postu a questione. Hè quandu a me zitella, Paulina mi dumandò perchè, ch’eu mi sò dettu chè ci vulia à lasciali qualcosa. ». L’artistu vulia fà dui dischetti, unu solu di creazione musicale (15 musiche) è l’altru di canzone (15 dinò) ma, fatta fine, hà sceltu di fà ne unu è di registrà lu à i studiò Ricordu. Hà scrittu ottu canzone, una Patriziu Croce è trè Ceccè Lanfranchi. Cum’è « Ghjaseppu d’Arrimatia » è u so sensu spirituale. U dischettu tratta di tematiche cum’è l’amore è i sintimi (ùn senti), fiure puetiche (sicreti di stelle, quandu tona u celu), cultura è identità (u cavallu, a chjama corsa….)

U dischettu hè dispunevule in vendita o nantu à e piattaforme dedicate. Una spassighjata musicale chì testimuneghja di a qualità di scrittura, cumpusizione è ancu vucale di l’artistu. Ellu cuntinueghja a so strada, cù forse una seguita postu ch’ellu hà torna una decina di scritti in i tiretti. È sempre a vulintà di cuntinuà à cuntà u so parè nantu à a vita d’oghje, ma à modu soiu. L’occasione, dinò, di travaglià nantu à un dischettu solu di musica.

Origine : Journal de la Corse