Nutiziale culturale

Mostra di l’artista Ninu Art à u magazinu Cultura di L'Atrium in Sarrola Carcupinu

Da u 20 à u 24 di ferraghju, l’artista Ninu Art spone una vintina di tele fundate nant’à a forza di i sguardi. Trà emuzione, visi di persone è temi impegnati, l’artista invita u publicu à scopre e so opere in veru, luntanu da i filtri numerichi. Ogni tela hà un’intensità particulare : i sguardi chjappanu è rendenu l’emuzione e più sottile, creandu un dialogu silenziosu cù u spettatore. Da vicinu, e tele campanu. Si risente una putenza in ogni sguardu, quasi cum’è sì a pittura ci fighjessi ancu ella. Pè Ninu, u sguardu hè impurtante, palesa una verità, sì a persona hè sincera o nò, sì qualcosa ùn và micca. Un affascinamentu chì guida u travagliu di l’artista dapoi più di quarant’anni. Pinghje hè per ella a so forma di spressione, a so manera di stridà in silenziu. U stridu di ste tele chì rimandanu dinù à prublemi suciali cum’è i zitelli piazzati à l’Aiutu Suciale à a zitellina o e donne vittime di viulenze. 

L’acrilicu hè u so arnese preferitu. Faciule à travaglià, li permette di disegnà un sguardu à u mumentu precisu induv’ellu s’impone. Ma certe opere abbisognanu pazienza è perseveranza. Ogni tantu, Ninu lascia una tela parechji anni prima di vultacci sin’à ottene u sguardu ch’ella cercava. A creatrice ùn cerca micca à piace à tutti, cerca piuttostu à fà riagì. L’opera pò piace o dispiace, pocu impreme. A riazzione hè sempre custruttiva. E so tele sò un spechju di l’emuzione umane, ogni tantu luminose o scure, ma sempre putente.