Nutiziale culturale

Vitalba: u giru pè i so vint'anni di creazione

Sti canterini sò pè u più di a regione curtinese è niulinchi. Hè esciutu u so primu dischettu “A lu ghjornu spuntatu” in u 2006. Ci truvemu tandu Stéphane Ancey, François Rocchi, Laurent Massiani, François Aragni, Toussaint Montera, Lionel Franchi, Jean-Marc Taddei, Jean-Mathieu Casanova, François Pieri, Petru Santu Geronimi è Jean-Yves Acquaviva. U so ripertoriu si scumparte in duie parte : pulifunie cantate senza accumpagnamentu musicale, inspirendusi da canti prufani è sacri di a tradizione pupulare corsa è dinù creazione originale, cum’è « Stirling Bridge » è « Mi ne vocu ».

Dopu u primu dischettu, Vitalba cuntinueghja à creà. In u 2011, esce u secondu, D’umbria è di Sulana, è in u 2017 In Terra d’Omi. Sti dischetti rispechjanu l’impegnu di u gruppu à perpetuà a tradizione musicale corsa è à tempu splurà nove sunurità. D’altrò, Vitalba ùn hè micca solu un gruppu pulifonicu. In e so creazione, face entre strumenti à pocu à pocu ancu sì i testi è a voce fermanu di primura.  

Di ghjugnu 2018, a morte di Toussaint Montera, membru fundatore, à 48 anni, hè una rumpitura pè u gruppu chì cuntinueghja quantunque à avanzà. Certi membri si ne vanu è altri ghjunghjenu pè mantene u spiritu originale di sta furmazione. In u 2022, esce u doppiu dischettu Chjerchju di Vita cù pulifunie, voce è cullaburazione nove. Vitalba hà sappiutu fassi una piazza in l’universu di a canzona corsa trà tradizione è mudernità. 

Rinsignamenti è biglietteria: https://vitalba.corsica