Nutiziale culturale

Tarraniu : i versi taravesi ripigliati à modu « arabinu »

Creata qualchì annu fà dopu à una dumanda di u Centru d’Arte Pulifonicu di Sartè, issa struttura hà travagliatu dui anni nantu à i versi di u Taravu ripigliati di manera à fà li entre in leia cù e radiche di u Mediterraneu. Cusì, hè natu « I versi arabini ».

In u 2021, Micheli Solinas, ch’è noi ùn prisentemu più, Ghjuvan Francè Vega Albertini, Tumasgiu Moscardelli è Cédric Savelli, anziani membri di u gruppu « Alba » s’aduniscenu per un prughjettu maiò : ripiglià, à modu « tarranincu », canti tradizunali di u Taravu. « À l’iniziu, spiega Micheli Solinas, aghju avutu un cuntattu cù u Centru di Sartè chì dumandava una pruposta di furmazioni. Mi dumandoni di circà à mettà in vali, un prughjettu urighjinali. Ci vulia à ripiglià i versi taravesi à partesi di u filu di Paulu Simonpoli « Canti Zicavesi è di u Cuscionu induva Natale Luciani facia l’intervista di Micheli Paoli. Aghju circatu parsoni ch’erani capaci di entra, cù a so musicalità, in issu prughjettu quì. Tandu, aghju pigliatu cuntattu cù Ghjuvan Francè Vega Albertini, Cédric Savelli è Thomas Moscardini. »

A squadra s’adunisce è si mette à travaglià nantu à canti famosi di u Taravu : « Diana di l’Alba », « L’alcudina », « u lamentu d’Antuninu », « i mulatteri d’Ulmetu » è altri pezzi strumentali, sta volta, cum’è « U valsu fiumurbacciu ». I strumenti aduprati sò a cetera, e percussione urientale, a ghitarra, u viulinu è a ghitarra bassa. « U scopu, aghjusta Micheli Solinas, era di circà à ripiglià issi canti ma cù un sonu diferenti, più vicinu da i nosci radichi di u Mediterraneu. »

Cusì, a squadra s’hè messa à travaglià dui anni fà à partesi d’u mese d’aprile, a maiò parte di u tempu in Pigna da cummencià à accuncià strumenti è voce. Strada facendu, un primu cuncertu hè statu urganizatu, sempre in Pigna, à a fine di l’annu 2023. « Dopu à issu cuncertu, avemi fattu una residenza, di farraghju in Pigna è di maghju 2024, avemi rigistratu u dischettu ind’è Ricordu. »

A squadra hà cuntinuatu u so travagliu, sbucchendu, à pocu à pocu, nantu à spettaculi di prumuzione in Pumonte, masimu in Aiacciu d’ottobre scorsu. « Dopu à un cuncertu, semi cuddati à veda à Micheli Paoli, cù Michela Cesari, avemi cantatu issi canzoni davanti à eddu. Hè statu cuntentu. Par noi, ghjè un umaggiu forti. » « Di manera più tecnica, ci voli à sapè chè i nosci ripresi s’arrembani nantu à modi diferenti, quarti di tonu, ritimi in cinqui tempi, ecc... »

Micheli, Tumasgiu, Ghjuvan Francè è Cédric anu da cuntinuà a so strada in u 2025 induve parechji cuncerti l’aspettanu in Calvi, Lumiu, Bastia, Castagniccia, Marignana. « In Marignana, u filmu serà prisentatu nanzu à u cuncertu. Una manera, dinù, di fà a leia trà i paroddi di Micheli Paoli è i nosci canzoni. »

Una bella scumessa, in Corsica, masimu in tempi induve u spiritu anticu si perde di più in più. Tarraniu puderia forse appruntà d’altri canti d’altri lochi di l’isula. Sempre à modu soiu.

Origine : Journal de la Corse